PONTECESURES> Chámanlle a princesa do Ulla, non se trata de ningunha persoa senón dun prezado peixe. Durante estes días quince embarcacións traballaran duro para conseguir o máximo de lampreas posibles. Teñen que darse presa xa que  a lamprea adulta volve os leitos  dos ríos só para desovar, unha vez feita a reproducción vai perdendo peso ata que chega a morte do animal.

O GROVE > Segue a incerteza entre as traballadoras de Marsac. A vindeira semana deberían incorporarse ó seu posto de traballo na factoría de Porto Meloxo para completar os pedidos de mexillón. Pero a día de hoxe aínda non teñen comunicación algunha por parte da empresa. Esta mañá o piquete que se mantén ás portas da fábrica recibiu a visita do secretario xeral de Comisións Obreiras en Galicia, Xan María Castro.

RIANXO > A corporación municipal de Rianxo celebrou este martes pola noite un pleno ordinario no trascurso do cal se aprobaron de xeito definitivo os orzamentos xerais do concello para o vindeiro ano que ascenden a case 5,8 millóns de euros. O proxecto económico recibiu o apoio do PSOE e do grupo mixto, mentres que os populares se abstiveron e os nacionalistas votaron en contra.

SALNÉS > Os pequenos comerciantes da comarca están a amosar a súa preocupación pola incipiente tendencia a facer descontos antes da época de rebaixas en determinados comercios. Os presidentes de Zona Aberta de Vilagarcía e de Zona Centro de Cambados fan un chamamento a estes comerciantes para que agarden a poñer as rebaixas a canda o resto.

MORAÑA > O presidente da Deputación de Pontevedra, Rafael Louzán, inaugura o sábado o novo campo de festas de Soar, na parroquia morañesa de San Lourenzo. Coa colaboración do organismo provincial e do grupo municipal do PP, a Comunidade de Montes conseguiu 72.000 euros para mellorar este espacio e dotar á parroquia dun parque infantil.

POBRA > O alcalde da Pobra do Caramiñal, Isaac Maceiras, reuniuse esta mañá co vicepresidente da Xunta e Conselleiro de Igualdade e Benestar Social, Anxo Quintana. No transcurso da xuntanza, Maceiras expúxolle ó representante autonómico as principais características do proxecto do Centro para a Integración de Menores con Discapacidade. Este servizo, de carácter pioneiro en toda a comarca, prestará servizo a rapaces procedentes de tódolos municipios barbanzáns.

BARBANZA > As súas Maxestades os Reis Magos de Oriente chegarán a Ribeira en barco. A saída da cabalgata será ás cinco e media da tarde dende a zona do Malecón. No resto da comarca sinalar que a cabalgata da Pobra do Caramiñal terá a súa saída ás seis da tarde, mentres que en Boiro e Rianxo será media hora máis tarde, ás seis e media.

VILAXOÁN > Ás queixas e peticións destes mariñeiros contestou o director do INTECMAR, Xosé Manuel Romarís, quen asegurou compartir a preocupación dos afectados. Neste sentido, Romarís remitiuse a unha serie de axudas que serán outorgadas pola Consellería de Pesca e que previsiblemente sairán publicadas no DOGA o mércores.

BARBANZA > O inicio de 2006 na vía autonómica do Barbanza non puido ser peor con dúas novas vítimas mortais no segundo día do ano. O sinistro tivo lugar á altura do municipio de Rianxo, nun tramo de vía moi perigoso, e saldouse co falecemento dos dous conductores implicados. A semana pasada rexistrouse outra morte na estrada, á altura de Boiro, que veu pechar o balance anual máis nefasto desta vía cun total de doce mortos ó longo do 2005.