POBRA > O alcalde da Pobra do Caramiñal, Isaac Maceiras, ten previsto manter este martes unha reunión co conselleiro de Medio Rural, Alfredo Suárez Canal, para cambiar impresións sobre o convenio para a realización de melloras nos camiños rurais. No caso de que a Consellería non asuma as obras aprobadas pola anterior Xunta de Galicia, o concello incluirá os traballos nos presupostos do vindeiro ano.

BARBANZA > Balance máis que positivo esta pasada fin de semana para os equipos da comarca do Barbanza na liga de Rexional Preferente. Boiro e Flavia gañaban por idéndico resultado, un a cero, ó Vizoño e Ordes respectivamente, mentres o Ribeira caía derrotado na Coruña polo Imperator por dous goles a un.

VILANOVA > A Asociación de Comerciantes Vilanova Centro prepara para este Nadal varias actividades para os máis pequenos. Os días 23 e 30 de decembro e o 4 de xaneiro a partir das 5 da tarde o pavillón será o escenario de varios obradoiros nos que participarán os cativos gratuitamente.

PONTEVEDRA > Alberto Núñez Feijóo e Xosé Manuel Barreiro aínda non chegaron a acordo para unificar as súas candidaturas nunha soa lista. Feijóo estivo hoxe en Pontevedra para recoller os preto de 700 avais conseguidos nesta provincia, unha cifra máis que suficiente para presentar en solitario á carreira sucesoria do PPdeG. Con estes apoios o ex conselleiro de Política Territorial xa adiantou que terá moi presente a Pontevedra na nova dirección do partido en caso de chegar a presidente.

PONTECESURES > Carlos Maside e Borobó darán nome a cadanseu premio no Concello de Pontecesures. É a principal novidade dun ambicioso programa cultural que deseña o goberno local para o vindeiro ano. A programación iníciase este Nadal con arte, obradoiros, cine e maxia, entre outras actividades.

PONTEVEDRA > Pontevedra inaugurou a Feira de Artesanía e Agasallos PONTENADAL. Máis de corenta casetas de distintos comercios, asociacións e ONGs que estarán abertas ó público na Praza de Teucro ata o vindeiro día 5 de xaneiro.

RIBEIRA > O Auditorio Municipal de Ribeira foi o escenario no que se desenvolveu durante todo o día do venres a I Xornada sobre a Violencia contra as Mulleres organizada polo Centro de Información á Muller. Con esta xornada o CIM de Ribeira continúa cos actos de concienciación social para denuncia-la violencia de xénero que sofren as mulleres.