Destacar a biomasa forestal como un recurso importante de enerxía. Arredor desta mensaxe versarán as diferentes conferencias no Segundo Simposium Forestalia. Varios expertos en materia forestal e ambiental aportarán ata mañá diversas experiencias neste eido.

O piragüismo arousán está a demostrar un gran potencial, despois de colleitar tres medallas no Mundial de Maratón de Australia. Esta mañá chegaban os palistas ás súas casas e todos traían moi bos recordos desta experiencia. No Grove estivemos cos pupilos do Breogán, Fredi Bea, Rubén Paz e Tono Campos; e na Illa, con Ramón Ferro, e co seu adestrador Arturo Paz.

Preto de 750 rapaces asistiron esta mañá no auditorio municipal de Vilagarcía ó espectáculo teatral e musical "O laberinto dos soños". As concellerías de Educación e Cultura e Caixa Galicia colaboran na programación desta obra, que correu a cargo da compañía Teatro Trabalinguas.

O Concello de Vilagarcía e Xestur xestionarán a ampliación do polígono industrial do Pousadoiro. A totalidade das parcelas xa foron comprometidas, segundo informou o xerente de Xestur ó alcalde Javier Gago.

A plataforma Ronda Non de Sanxenxo criticou duramente a decisión do Alcalde, Telmo Martin de desconvocar a reunión que daría a coñecer a súa posición sobre a alternativa ó trazado que os veciños ofreceron na primeira xuntanza. Segundo os veciños, esta decisión é o resultado da sua negativa de reunirse cos voceiros da oposición, tal e como demandaba a plataforma.

Os transportistas de mercancía por estrada lograron sobre a unha deste mediodía pechar un acordo co Goberno sobre as medidas que demandan para compensar a suba do combustible. O acordo supón unha solución ó céntimo sanitario. Sen embargo, o paro manterase ata que o sector consiga tamén o pertinente acordo cos cargadores, aínda que esperan que se poida acadar durante a xornada de hoxe.

Os procesos electorais abertos nas confrarías de Vilanova e da Illa de Arousa están arestora en mans da Consellería de Pesca. No caso vilanovés, os técnicos do departamento autonómico están a depurar os censos para garantir a participación dos socios. En canto á Illa de Arousa, o calendario proposto pola confraría aínda non foi aprobado por Pesca.