VILAGARCÍA > Vilagarcía deu a coñecer as obras que o Goberno municipal acordou solicitar para a inclusión no Plan Provincial de Cooperación e no Plan Operativo Local 2.006. No primeiro proponse a pavimentación de varios camiños das parroquias vilagarciáns. No segundo plan incluíuse  ampliación do Centro Sociocultural de Carril  e a mellora da rede de saneamento de Arzobispo Gelmírez como obra complementaria.

BARBANZA > As Policías Locais de Ribeira, Pobra do Caramiñal, Boiro e Rianxo dispoñen dun vehículo dotado con radar e alcolímetro que lle foi entregado pola Subdelegación do Goberno na Coruña. A partir de agora na comarca aumentarán os controis de tráfico, fundamentalmente nas vías urbanas, co fin de evita-lo alto número de accidentes que se rexistran nas estradas da zona.

MEAÑO > O Concello de Meaño amosa este mes a renovada Casa de Cultura de Dena e aproveita para presentar ós veciños a nova política social deseñada polo goberno local. O vindeiro ano, o equipo de Jorge Domínguez pretende investir 150 mil euros en dotar de contido a rede de infraestructura socio cultural e deportiva.

SANXENXO > Centos de persoas achegáronse hoxe á parroquia de Nantes, en Sanxenxo para participar na Festa da Fabada. A comisión practicamente esgotou as existencias, servindo case cen kilos de fabada e oitenta de empanadas. Con esta cita gastronómica, a parroquia inicia catro días de festa ata o domingo.

MEIS > No Día da Inmaculada e a pesares do mal tempo algúns aproveitaron para practicar deporte e pasear. É o caso por exemplo dun grupo de xinetes de toda a provincia que se reuniron este xoves en Meis. A xornada de convivencia comezou cunha ruta a cabalo polo monte Castrove e rematou cunha comida e cunha tarde de xogos.

POBRA > O departamento de Servizos Sociais do concello da Pobra do Caramiñal vén de poñer en marcha a campaña informativa de Nadal "Un xoguete, un mundo”. O obxectivo é ofrecer información detallada sobre os xogos de calidade que resulten máis axeitados ás necesidades lúdicas e pedagóxicas dos nenos.