PONTECESURES> O grupo de goberno de Pontecesures non atravesa o seu mellor momento. O grupo ACP que forma goberno co BNG está considerando  un novo pacto con outro partido para dirixir o Concello.  Segundo Luís Sabaríz, Concelleiro de ACP existen moitas diferencias entre os dous grupos debido a falla de respecto dos nacionalistas.

VILAGARCÍA> O director xeral de vivenda e solo, Daniel Pino, visitou esta mañá a Cámara de Comercio de Vilagarcía para informar sobre o solo industrial da Comarca do Salnés. Un dos temas que centrou a conferencia foi a situación do polígono de Baión. Pino afirmou que se comezará a construír no ano 2.007 e que actualmente está en proceso o estudio de viabilidade do proxecto. O alcalde de Vilanova, Gonzalo Durán discrepou da exposición e corrixiu varios erros.

O GROVE > Os socios do Club de Remo Mecos, do Grove, están de aniversario. O domingo celebraron as súas vodas de prata nun acto no que participou o director xeral para o Deporte, Santiago Domínguez, o alcalde Miguel Ángel Pérez, e un gran número de socios e veciños.

SANXENXO > A casa consistorial de Sanxenxo está estes días en obras. Hoxe deron comezo os traballos para ampliar as dependencias municipais cun novo anexo. Con esta remodelación, o concello reorientará a súa fachada cara a avenida de Madrid. Os veciños poderán seguir realizando as súas xestións no concello pero durante as obras, a alcaldía trasladarase ó Pazo Emilia Pardo Bazán.

BOIRO > A movida nocturna de Boiro segue a ser orixe de polémica. Nesta ocasión, non se tratou dun desacordo entre empresarios e veciños senón que o problema centrouse nunha nova emitida pola Televisión de Galicia o pasado 23 de novembro.

BOIRO > A Federación de Empresarios do Barbanza presentou a súa campaña de Nadal na que se repartirán un total de cincuenta mil euros en vales de compra. Os boletos comezarán a repartirse este mesmo xoves en preto de mil establecementos de toda a comarca. O obxectivo é animar ós consumidores a realiza-las súas compras no pequeno comercio.

VILAGARCÍA > O deporte da comarca vestiuse esta fin de semana de longo. Coincidindo co sesenta aniversario do club de fútbol Arosa, foron inauguradas as obras de remodelación do campo de fútbol da Lomba. Autoridades e destacadas figuras do deporte rei estiveron presentes durante o acto.

VILAGARCÍA > E trala inauguración do Campo da Lomba, os asistentes ó acto desprazáronse ata Fexdega. Alí tivo lugar o xantar para celebrar o sesenta aniversario do Arosa S.C. Unha comida na que houbo palabras para destacar o labor do clube e espazo para a lembranza.

VILAGARCÍA > Demandar a Alfageme a suspensión do traslado e solicitar ás Consellerías de Traballo, Pesca e Industria unha reunión urxente coa empresa, sindicatos, comité de empresa e concello. Con este acordo oficializouse este venres o apoio da corporación municipal do Grove ás traballadores de Marsac, nun día no que a cidadanía volveu saír á rúa para pedir 'non ó traslado'.