POBRA > A Policía Local da Pobra do Caramiñal ten previsto incrementa-la vixilancia no municipio a raíz dos roubos acontecidos nos últimos días.Nestas laboras a Policía Local pobresa contará coa colaboración dos axentes da Garda Civil.

VALGA > Unha vez máis o Concello de Valga inaugurou o seu popular Belén. Preto de 2.000 figuras dan vida ós personaxes bíblicos e ós costumes galegos. Trala inauguración o pai Isorna  puxo un ano máis en movemento o gran Belén que conta dende fai semanas coa participación das Persoas da Asociación Amigos do Belén.

BARRO > Concellos como Barro, Pontevedra, ou Vilagarcía recollen na súa historia batallas ou escaramuzas durante a Guerra de Independencia en 1809. Para recuperalas estase a fraguar na provincia a asociación Heroes da Ponte do Río Barosa. O principal obxectivo será preparar para 2009 a recreación da Batalla de Ponte Sampaio.

VILAGARCÍA > Ariadna Martínez e Damián González, proclamáronse este domingo gañadores da II Milla Solidaria de Vilagarcía. Ademais de cadanseu trofeo, ambos corredores recibiron un cheque de 150 euros cada un que doarán á Asociación Con Eles e a InteRed Galicia. Nesta proba solidaria participou unha vintena de persoas.

VILAGARCÍA > A asemblea do Liceo Casino de Vilagarcía ratificou a Álvaro Paz como novo presidente da entidade. Ó ser a única candidatura presentada trala dimisión da anterior executiva, os socios non tiveron que votar. Entre os obxectivo da nova dirección, está a profesionalización da xestión e ampliar o número de socios.

SANXENXO > O Consello da Xerencia de Urbanismo de Sanxenxo trata este xoves a aprobación inicial do estudio de detalle do PEI número 13, ubicado no centro urbano de Sanxenxo. O desenvolvemento deste polígono reportará preto de 38 mil metros cadrados de zona verde para un parque público e 4.500 metros cadrados para ubicar o edificio do futuro concello.

CATOIRA > A empresa Necso farase cargo das obras do Parque Empresarial de Catoira a partir deste mércores. Segundo informa o concello, os traballos comezarán coa limpeza do terreo, demolicións e movementos de terra para conseguir as rasantes do viais. A oferta presentada pola adxudicataria ascende a 1,4 millóns de euros.

BARBANZA > A xornada de liga na Rexional Preferente desta fin de semana non foi moi positiva para os equipos barbanzáns, posto que tan só o Flavia foi quen de consegui-la vitoria. Os padroneses dobregaban ó Compostela por un gol a dous. O Club Deportivo Boiro perdía por tres goles a un no seu desprazamento a Ordes e o Atlético Ribeira non pasaba do empate a uns na casa co As Pontes.