O servizo do spad do Grove continúa coas actividades de prevención de drogodependencias no ámbito escolar,  concienciando ós adolescentes do perigo que entraña o consumo destas sustancias e ós mestres das liñas a seguir na  formación dos rapaces. Por outra banda este ano inciaránse uns cursos formativos dirixidos ós pais e nais, afondando na educación no seo familiar.

En fútbol, destacamos en Terceira División, a sexta derrota consecutiva do Arosa e, pola contra as cinco xornadas que leva o Céltiga sen coñecer a derrota. O Arosa xogou en Baltar contra o Portonovo, que gañou 2-1; mentres que o Céltiga empatou a 2 co Lugo. En Rexional Preferente, empate a cero en Cambados, e o Unión O Grove venceu a domicilio ó Gondomar por 1-3.

Os comuneiros de Oubiña celebraron por todo o alto o arquivo do expediente aberto conta máis de 70 veciños por supostas irregularidades fiscais. A denuncia remóntase á venda do monte para construí-lo polígono industrial de Sete Pías.

O Concello de Pontecesures dispón xa da parcela correspondente ó selado do vertedoiro de Condide. A Xunta formalizou a pasada semana a entrega da obra finalizada comunicando ó Concello que agora deberá asumir a explotación da parcela, ademais de establecer un plan de vixiancia e control do selado.

Varios membros da asociación de compradores de pescado de Ribeira denunciaban o peche da lonxa. Os traballadores non entenden as causas de que un organismo público cese a súa actividade e secunde a folga sen ter en conta ós mariñeiros que non apoiaron o paro e seguen a desenvolver a súa actividade.

Os piragüistas do Breogán O Grove que participaron no Mundial de Maratón en Australia recibiron o venres pola noite un caluroso recibimento. Como vén sendo xa habitual cada vez que colleitan un logro deportivo, organizouse unha caravana de coches pola vila e despois foron recibidos no concello.