VILANOVA > A figura de Valle Inclán conta desde este venres cun novo reducto para o seu estudio e difusión. A Fundación Valle Inclán inaugurou a súa nova sede en plena praza da Pastoriza, lugar moi vinculado á infancia do ilustre escritor. Os seus impulsores describiron este local como un complemento das iniciativas valleinclanianas aberto a tódolos vilanoveses.

SALNÉS > A aplicación dos contratos de compravenda de uva acordados na Mesa do Viño Rías Baixas parece que está a devolver a tranquilidade a un sector inmerso nas tarefas da vendima. O Sindicato Labrego Galego constatou nas subzonas desta Denominación de Orixe do Salnés, Baixo Miño e Condado que a uva se está a colocar sen problemas e incluso por riba do prezo mínimo acordado na Mesa.

RIBEIRA > A executiva local do PSOE de Ribeira vén de verter duras críticas sobre os alcaldes do PP, especialmente sobre o grupo de goberno do seu concello. Os socialistas denuncian que a secretaría de organización do PP da Coruña ordenou ós rexedores populares a actuar con dilación facendo responsable ó goberno da Xunta dos retrasos na contratación das brigadas contraincendios. Segundo o grupo socialista esta actitude contribuíu a agravar a vaga de lumes que viviu Galicia o mes pasado.

BOIRO > O alcalde de Boiro, Xosé Deira, anunciou o cesamento do concelleiro independente Manuel Velo como membro do executivo por incumprimento do pacto de goberno. Segundo o rexedor boirés a súa actitude é ‘inadmisible’ posto que dende hai tempo ‘tenta desestabilizar calquera acción de goberno’ opoñéndose a proxectos de vital importancia para o municipio e ocultando información á opinión pública.

POBRA > O deputado autonómico do PSOE, Xosé Manuel Lage Tuñas, desprazouse ata a Pobra do Caramiñal para atender ás demandas dun grupo de veciños que viven nas inmediacións da estrada AC 302. Os cidadáns reclaman que o proxecto de remodelación do vial, actualmente en obras, contemple a construcción de beirarrúas. A visita do parlamentario colleu por sorpresa ó alcalde pobrés, que compareceu ante os medios para anunciar o remate destas obras en outubro.

BOIRO > Durante os meses de verán o departamento de Urbanismo de Boiro asesorou a preto de 100 familias da localidade nos trámites a seguir para a consecución das axudas creadas pola Xunta de Galicia no tocante á vivenda. Este alto índice de atención ó cidadán foi posible grazas á revista ‘Urbanismo con B de Boiro’ editata polo concello e na que se facilita información periódica sobre axudas e outras cuestións urbanísticas que poden ser de interese para a poboación.

POBRA > O concello da Pobra está a xestionar coa Demarcación de Costas a rexeneración ambiental das marismas das xunqueiras. Esta actuación, orzamentada en preto de dous millóns de euros, contempla a integración deste espazo no casco urbano para o seu aproveitamento como zona recreativa e de lecer.

RIANXO > A polémica rotonda construida en Rianxo xa está a ser retirada das inmediacións do colexio Castealo. Cumprindo así co compromiso adquirido polo alcalde rianxeiro e o delegado de Educación, varios operarios retiraron a finais da semana pasada parte desta infraestructura, unha medida temporal ata que se adopte unha decisión definitiva sobre a ordenación do tráfico na zona.

BOIRO > A parroquia de Escarabote foi o lugar escollido polo executivo boirés para construir 25 novas vivendas de protección oficial. O proxecto, que conta co apoio da Consellería de Vivenda, estará destinado á xente nova do concello menor de 35 anos, aínda que tamén se habilitará algunha das vivendas para persoas maiores de 65 que actualmente vivan en edificios calificados pola Administración como infravivendas.