VILAGARCÍA > A Policía Local detivo na madrugada do mércores ó xoves a un individuo de 46 anos que conducía borracho a gran velocidade na estrada de Pontevedra pola zona de Rubiáns. Tamén detivo, por intento de furto a un indixente que pretendía entrar a roubar nun establecemento da Mariña.

CALDAS > Dez foi o número de medallas que trouxeron baixo o brazo os integrantes do equipo de natación do Centro Ocupacional Saiar. 9 rapaces e 7 rapazas competiron no Campionato Galego de Natación para discapacitados intelectuais que se celebrou o mércores na Cañiza. Nós estivemos con eles nun dos seus adestramentos.

MEIS> O concello de Meis comezará esta semana a campaña en contra do posible traslado de Ence ó polígono Meis – Barro. Nestes días colocaranse pancartas de protesta en todas as parroquias e os rexedores de ámbolos dous concellos manterán reunións con todos os veciños parar decidir as medidas de presión que se levarán a cabo no caso de que esta proposta sexa unha realidade.

VILAGARCÍA > O voceiro de Esquerda Unida de Vilagarcía, Juan Fajardo denunciou que o traslado da estación de autobuses a Fexdega anunciado polo goberno local, escondería unicamente un pelotazo urbanístico.

MEIS> A autovía do Salnés está en marcha. Esta semana o concello de Meis está tramitando xa a expropiación dos terreos afectados. Na casa consistorial os veciños poden observar ata o vindeiro luns os planos nos que se aprecia o trazado. Agora o obxectivo do alcalde será asegurarse de que o concello terá unha saída na nova  autovía.

VILAGARCÍA > Converter a praza de abastos nun centro especializado de productos da compra cotiá. Esta é a filosofía do anteproxecto de mellora do mercado de Vilagarcía elaborado por Mercasa. A actuación xa foi presentada ós grupos municipais e ós comerciantes da praza.

VILAGARCÍA > Os traballadores da estiba do porto de Vilagarcía aseguran que están nunha situación límite. Ante a mingua importante no tráfico de túnidos e recoñecida incluso polo presidente da Autoridade Portuaria, sindicatos e traballadores esixen unha entrevista urxente coa conselleira de Política Territorial.

VILAGARCÍA > A federación comarcal de Arousa en colaboración coa Confederación de Empresarios de Pontevedra organizou unha mesa de traballo na que se abordou a situación das empresas no Salnés. A mesa é o froito dun exhaustivo estudo de análise da empresa municipio por municipio.

VILAGARCÍA > O campo de fútbol da Lomba, en Vilagarcía, acolle no mes de abril a fase previa do campionato Arousa Fútbol 7. Nesta liga preliminar participan 58 equipos, algúns deles procedentes de Portugal. O primeiro encontro será o día 8 ás nove da mañá, entre o Arosa B e o Condado B.

PONTEVEDRA > Outro problema que afecta á xente xoven e que ultimamente volve estar de plena actualidade é a polémica suscitada pola extrema delgadez dalgunhas das modelos que desfilaron nas pasarelas Cibeles e Gaudí e as enfermidades derivadas, como a anorexia ou a bulimia. Con esa carga e as miradas postas nas protagonistas, arrancará a decimo sétima edición de Pontus Veteris en Pontevedra.