PONTECESURES > O último venres de febreiro tiña lugar en Pontecesures un pleno centrado nunha moción da Agrupación Cidadá de Pontecesures relativa ás industrias “Nestlé” e “Finsa”. Sabariz denunciaba na moción a presunta intención de Xestur de trasladar as factorías pola súa “mala ubicación” e propuxo rexeitar esta idea por tratarse de dúas empresas que son “o motor económico da comarca”.

SALNÉS > O último luns de febreiro daba comezo a campaña da vieira, que no caso de que o tempo continúe frío, se podería prolongar ata mediados de abril. Ata o Porto de Tragove, en Cambados, chegaron 4000 quilos de producto capturados polos 150 tripulantes das 50 embarcacións que saíron a faenar no primeiro día. A pesar de que a campaña comeza tarde, a calidade da vieira está garantida.

CAMBADOS > O equipo de goberno de Cambados aprobaba en solitario a pasada semana os orzamentos para o presente exercicio, que ascenden a 10 millóns 800 mil euros. O alcalde, Cores Tourís,  manifestou esta fin de semana que o concello alcanzou as máximas cotas de inversión e que Cambados é un dos concellos galegos menos endebedados.

POBRA > As Confrarías de Pescadores da Ría de Arousa veñen de aprobar o plan de xestión e recuperación dos bancos de libre marisqueo. Este proxecto, elaborado conxuntamente entre os pósitos da Pobra e o Grove, contempla o cultivo de cría nas zonas máis deficitarias así como o incremento do persoal de vixilancia de cara a un maior control da explotación dos bancos.

RIANXO > O alcalde de Rianxo, Pedro Piñeiro, desprazouse ata Madrid para presentar o proxecto do Polígono Industrail de Té no Salón de Espazos Empresariais, Comerciais e Industriais (SEIN). A selección deste proxecto supón un importante paso para a súa promoción de cara á captación de empresas de todo o país.

RIBEIRA > O executivo municipal de Ribeira presentou o proxecto de rehabilitación da emblemática casa de Dona Adela. O inmoble será restaurado para a súa conversión en museo, respectando en todo momento o aspecto orixinal da casa posto que se trata dun edificio catalogado como ben patrimonial.

RIBEIRA > O Tenente-Alcalde de Ribeira e Voceiro do Partido Popular, Manuel Ruiz Rivas, vén de presentar unha moción para o seu debate na vindeira sesión plenaria solicitándolle á Xunta e á Deputación Provincial da Coruña unha partida presupostaria para axudar, tanto a particulares como a empresas e ás administracións locais, polos danos producidos a causa do temporal.

POIO > O concello de Poio traballa nun convenio coa Consellería de Vivenda para a creación de vivendas de Protección Oficial no municipio. Así o acordaron na reunión mantida entre o delegado de Vivenda en Pontevedra, o alcalde e mailo presidente de Xestur. No encontro trataron tamén o tema do polígono industrial da Fraga Moreira maila problemática da sentencia xudicial de derrube de chabolas do asentamento xitano do VAO.

RIBEIRA > Os veciños do lugar de Fondevila, en Ribeira, veñen de denunciar o estado de abandono no que se atopa o seu barrio debido á falla de investimentos realizados polo concello neste lugar. Ás deficiencias estruturais en rúas e na rede de sumidoiros, hai que sumar a escaseza dos servizos básicos posto que a recollida do lixo realízase cada dous días e non a diario como no resto do municipio.

BOIRO > Novo suceso relacionado co tráfico de drogas na comarca do Barbanza. A Garda Civil de Boiro detivo a tres persoas acusadas de vender estupefacientes ás portas dos institutos da localidade.  Tralo arresto, os axentes procederon ó rexistro dun garaxe propiedade dos detidos onde atoparon dous quilogramos e medio de haxís e os embalaxes doutro seis quilos xa vendidos.