SANXENXO > A asociación de comerciantes de Sanxenxo, Entretendas aposta forte pola súa campaña de Nadal. O Centro Comercial Urbano sorteará o 28 de decembro un total de 8.000 euros, repartidos nun único premio de 6.000 euros e noutros 20 de 100 euros cada un. Ademais organizou actividades na rúa para os días 23 e 24.

PONTEVEDRA > O presidente provincial do partido, Rafael Louzán cualificou a xornada electoral de intensa e sen precedentes. Destacou sobre todo a alta participación, que no caso das tres principais cidades da provincia, Vigo, Pontevedra e Vilagarcía, chegou a superar o 30 por cento.

AROUSA > As bateas están cheas de mexillón que non se pode extraer e por tanto as cordas permanecen ocupadas polo que algúns productores optan por esperar para comeza-la nova crianza. Finalmente decidiuse seguir adiante. Mentres tanto persiste a marea vermella. Pese a que xa se puido abrir un polígono, as expectativas do Intecmar non son moi boas.

SANXENXO > O BNG de Sanxenxo solicita ó alcalde que paralice de forma inmediata as obras de reforma que se están levando a cabo na Casa Consistorial. Os nacionalistas entenden que no convenio asinado no seu día coa Consellería de Xustiza se contempla só a remodelación do edificio pero non a súa demolición. Denuncian ademais que a obra tampouco ten licencia municipal.

CAMBADOS> O Concello de Cambados presentou esta mañá a programación de actividades durante a tempada de Nadal. Dende o seis de decembro ata o seis de xaneiro os rapaces serán os principais protagonistas destas xornadas. A postal gañadora do Concurso de postais entre os colexios será o centro do cartel festivo. A autora é unha rapaza que cursa o quinto curso e pertence o colexio Antonio Magariños.

O GROVE > EMGROBES repartirá este Nadal entre os seus clientes 5.000 euros en vales de compra. A directiva da asociación presentou esta mañá a campaña de promoción do Centro Comercial Aberto DE TENDAS do Grove. Trátase de inventival as compras destas datas no comercio local, tal como indicou o presidente de EMGROBES, Juan Búa.

VILANOVA >Hoxe abre as portas a escola de gaitas e percusión da provincia de Pontevedra na Comarca do Salnés. A Casa de Cultura de Corón en Vilanova de Arousa foi o lugar elixido para desenvolver as clases que terán a mesma duración que o curso escolar. Ata o momento hai cincuenta alumnos matriculados pero o prazo de inscrición continua aberto.