BOIRO > Os membros do Grupo Municipal do BNG de Boiro, que forman parte do equipo de goberno, compareceron en rolda de prensa para dar conta das obras e inversións que se van realizar en cada parroquia con cargo ós presupostos municipais. Os propios veciños, a través das entidades e asociacións de cada parroquia, foron os encargados de escoller as inversións a realizar.

BOIRO > A corporación municipal de Boiro celebrará o próximo xoves un pleno de carácter ordinario no que se abordarán, entre outros temas, os proxectos de mellora en varios puntos do litoral boirés. A este respecto, o tenente alcalde do concello, Xoán Xesús Ares, mantivo hai uns días unha xuntanza co Xefe da Demarcación de Costas en Galicia, Rafael Eimil, para aborda-los proxectos de creación de paseos marítimos nestas zonas.

RIBEIRA > A sorte volveu deixarse caer por Ribeira xa que o sorteo da Lotería Primitiva do sábado deixou na localidade un premio de 2’3 millóns de euros. Os afortunados foron un grupo de mozos ribeireses que xogaban os seis números da combinación gañadora. O boleto fora selado na Administración Número 1 de Ribeira, rexentada por Joaquín Valeiras Martínez, que xa ten repartido varios premios noutras ocasións.

POBRA > A comisión executiva da Agrupación Local do PSOE da Pobra do Caramiñal vén de retira-lo seu apoio institucional ós concelleiros do grupo municipal socialista polo incumprimento dos acordos consensuados entre as dúas partes. A decisión vén motivada principalmente pola actuación dos representantes municipais en relación á aprobación do PXOM posto que non informaron á agrupación da celebración do pleno nin respectaron a posición do partido que sempre manifestou o seu rexeitamento á proposta do goberno local.

BARBANZA > Este luns tivo lugar o acto oficial de traspaso de poderes na Mancomunidade de Municipios Arousa Norte no transcurso dun pleno durante o cal se perfilaron tamén as liñas de actuación que seguirá a entidade este ano. O alcalde de Rianxo, Pedro Piñeiro, cedeulle a presidencia ó seu homólogo pobrés, Isaac Maceiras,  que ocupará o cargo durante o 2006.

BOIRO > Os donos dos nichos e panteóns do cemiterio de Santa María do Castro mantiveron unha xuntanza para decidir a posta en marcha dunha comunidade de usufructuarios do recinto. No transcurso da reunión procedeuse á aprobación dos estatutos da comunidade e nomeáronse os cargos da xunta rectora. A nova comunidade constitúe a primeira en Galicia das súas características.

RIBEIRA > O tenente alcalde de Ribeira, Manuel Ruíz, referiuse ó deficitario estado das instalacións do matadoiro ribeirés que a día de hoxe, lonxe de prestar un bo servizo, soamente está a causar perdas. O deputado popular entende que é necesario e positivo o feito de que existan instalacións deste tipo pero apuntou a  urxencia de acometer unha reforma para adaptar as actuais dependencias ás esixencias da normativa europea.

BARBANZA > Na actualidade e cando a Consellería de Política Territorial está a acelera-los trámites para a conversión da Vía Autonómica do Barbanza, coñecida como Vía Rápida, en autovía son máis as persoas que veñen amosa-lo seu malestar pola elevada sinistralidade que presenta esta estrada. Unha destas persoas é Manuel Domínguez, un veciño de Ribeira que vén de da-los primeiros pasos para a fundación da primeira Asociación de Afectados por este vial na comarca.