PONTEVEDRA > Comisións Obreiras mantén outro fronte aberto coa administración. Neste caso en Pontevedra e contra o traslado da factoría de Ence, emprazada en Lourizán. O sindicato solicitou, sen resposta, unha reunión co conselleiro de Industria e urxe a convocatoria da mesa de concertación anunciada no seu día por Emilio Pérez Touriño.

PONTEVEDRA > A Secretaría Xeral de Emigración da Xunta de Galicia mailo Concello de Pontevedra asinaron a finais de ano un convenio por valor de 90.000 euros que potenciará a labor da Oficina de Atención a Inmigrantes.

PONTEVEDRA > Alberto Núñez Feijóo e Xosé Manuel Barreiro aínda non chegaron a acordo para unificar as súas candidaturas nunha soa lista. Feijóo estivo hoxe en Pontevedra para recoller os preto de 700 avais conseguidos nesta provincia, unha cifra máis que suficiente para presentar en solitario á carreira sucesoria do PPdeG. Con estes apoios o ex conselleiro de Política Territorial xa adiantou que terá moi presente a Pontevedra na nova dirección do partido en caso de chegar a presidente.

PONTEVEDRA > Pontevedra inaugurou a Feira de Artesanía e Agasallos PONTENADAL. Máis de corenta casetas de distintos comercios, asociacións e ONGs que estarán abertas ó público na Praza de Teucro ata o vindeiro día 5 de xaneiro.

POIO > Preto de corenta persoas participarán no segundo obradoiro de emprego que se desenvolverá no concello de Poio a partir do día 30. Os traballadores seleccionados terán unha dobre misión: formarse nos módulos de carpintería, cantería e xardinería e restaurar unha importante casa familiar que albergará a futura gardería municipal.