SALNÉS > Inelga e Establecimientos Otero acadaron grandes victorias nos seus respectivos compromisos. Non se pode falar de pleno de triunfos xa que o Extrugasa caeu en Zaragoza ante o Mann Filter.

Cinco partidos consecutivos, contando este último, son os que leva o Extrugasa sen gañar fóra da casa. Desta volta a derrota foi en Zaragoza, ante o Mann Filter, un equipo da parte da baixa da clasificación co que caeu por 63-59.

Coma ven sendo habitual, a derrota veu dada pola falta de acerto nos momentos clave. A medio minuto para o final do partido e dous puntos por debaixo desperdiciouse un ataque que podería ter cambiado o signo do encontro. Pero o problema estivo tamén nos 39 minutos anteriores, nunha primeira parte na que a defensa non funcionou e encaixou 40 puntos, e no atasco en ataque que fixo que as vilagarciáns só dispuxeron dunha vantaxe no marcador en todo o encontro, no segundo cuarto.

As mellores en ataque voltaron a ser Sara Gómez, con 16 puntos e Marina Kress con 14. Esta derrota non afecta ás aspiracións das de Isaac Fernández de meterse en playoff; continúan séptimas na xeral con dúas victorias de marxe sobre o noveno clasificado.

Na EBA sí que podemos falar de victoria, a do Inelga en Zamora por un axustado 69-70. Séptima victoria consecutiva dos de Juan Espiñeira que continúan a súa xeira imparable.

De tódolos xeitos, a piques estiveron de voltar coas mans baleiras debido a inoperancia dos árbitros de mesa. Estropeouse a bociña do pavillón e os cronómetros foron levados manualmente; así as cousas os zamoráns dispuxeron dunha última posesión de máis de 35 segundos que non souberon aproveitar. Ó final, a victoria veu para Vilagarcía.

A mellor nova da xornada chegou dende Cambados, onde tres semanas despois o Establecimientos Otero reencontrouse coa victoria contra o mellor rival posible, o intratable líder Cafegal Pabellón, que sucumbíu de maneira estrepitosa no Pombal por 96-69. Os de Diego Doval continúan terceiros na xeral.

Redacción Salnés