Como cada ano, numerosas persoas concentráronse na Casa da República de Isorna para asistir ó acto de entrega do Premio de Poesía Faustino Rey Romero, que desta volta chegou á súa oitava edición.

En primeiro lugar celebrouse unha ofrenda floral diante do monumento dedicado a Rey Romero, que estivo amenizado por unha banda de gaitas, completándose o acto coa lectura de varios poemas do autor rianxeiro. Seguidamente, os asistentes desprazáronse ó interior do centro sociocultural, onde se celebrou o acto de entrega.

Despois, o escritor Manuel Dourado Deira realizou unha intervención na que relatou a súa relación con Faustino Rey Romero .

O gañador da edición deste ano foi David Souto Alcalde coa obra “Naufraxios das árbores”, aínda que non puido acudir en persoa a recibi-lo galardón e os 600 euros cos que estaba dotado o premio ó atoparse en Italia por unha bolsa de estudos.

O mesmo lle ocorreu o vigués Xavier Patiño Loira, que recibiu unha mención especial, sen dereito a premio, polo traballo “De infima scientia”, sendo dous amigos dos premiados os encargados de recollelos no seu nome.

Ademais, o xurado quixo manifestar o alto nivel das obras presentadas este ano e agradece-lo interese amosado por tódolos poetas concursantes, polo que os animou a participar na vindeira edición.

O xurado estivo presidido pola escritora Helena Villar Janeiro, e actuaron como vocais Avelino Abuín de Tembra, Xesús Santos e Paco de Tano. Exerceu de secretaria María del Carmen Figueira Ares.

No acto tamén actuou o grupo Aisas, patrocinado pola Deputación Provincial da Coruña.