VILAGARCÍA > O Presidente da Xunta de Galicia, Emilio Pérez Touriño, estivo esta mañá en Vilagarcía na que é a súa segunda visita institucional ó concello.

Foi con motivo das obras da variante norte de Vilagarcía, que a Conselleira de Política Territorial, María Xosé Caride, asegurou estarán rematadas antes de que remate o 2008.

A infraestrutura, de 7,8 quilómetros de lonxitude, conforma xunto co vial de aceso ó Porto que está a executar o Ministerio de Fomento, a circunvalación da localidade, que ámbolos dous políticos subliñaron é xa a oitava cidade de Galicia. Unha cidade para a que a circunvalación vai supor un impulso ó seu crecemento económico, ó mellorarse a súa rede de comunicacións. E é que co nova variante desconxestionarase o tráfico na vila, ó evitar o paso dos vehículos pesados polo centro.

A visita desta mañá é a segunda que fai Emilio Pérez Touriño en dous anos a Vilagarcía, e tamén a segunda que fai un Presidente da Xunta en dúas décadas ó concello. Un xesto que a alcaldesa, Dolores García, indicou reflexa o compromiso do executivo autonómico pola localidade, que é para Touriño un referente do desenvolvemento social e económico de Galicia.

A variante norte incorporou melloras no proxecto construtivo coa inclusión de máis enlaces, e tamén para atender ás demandas do veciños de Castroagudín. Unhas modificacións que supuxeron un incremento de 500.000 euros no orzamento dunha infraestrutura que lle custa á Xunta algo máis de 28 millóns e medio de euros,e que calculan vai estar rematado este ano. A circunvalación de Vilagarcía vaise complementar co vial de aceso da AP-9 ó Porto de Vilagarcía que está a executar o Ministerio de Fomento, e que se prevé estará rematado para o verán do 2009.

Cambio histórico no Salnés

Tanto o Presidente da Xunta, coma a Conselleira de Política Territorial quixeron lembrar esta mañá en Vilagarcía a inversión que o executivo autonómico está a tamén na comarca en canto ás infraestruturas. A autovía do Salnés ou a futura autovía que unirá Pontevedra con Vilagarcía son algúns dos exemplos dados por Emilio Pérez Touriño para xustificar a existencia dunha etapa de cambio histórico e sen precedentes nas infraestruturas de mobilidade na Arousa. Unhas obras coas que a responsable de Política Territorial, María Xosé Caride, asegurou se están a cubrir varias eivas no trasporte da zona, a través dunha serie de infraestruturas potentes e preparadas para os incrementos de capacidade que poidan ter que afrontar no futuro estes viais.

Na síntese que a Conselleira de Política Territorial fixo das actuacións do seu departamento e do Estado na comarca, están a circunvalación de Vilagarcía, coa conexión do Porto coa AP-9, ou o enlace deste vial coa estrada de Vilagarcía-Cambados. A estas infraestruturas hai que engadir a autovía do Salnés, que se atopa na súa última fase de execución, e outros proxectos aínda pendentes coma a autovía Vilagarcía-Pontevedra, na que xa se comezou o proceso de contratación do trazado, ou a conexión entre as redes viarias de alta capacidade da Xunta cos da rede estatal, coma a AP-9 ou a nacional 550.

En cifras, estas actuacións tradúcense nun investimento de 235 millóns de euros no Salnés, polos que o Presidente da Xunta, xustificou a existencia dun cambio histórico sen precedentes nas infraestruturas de mobilidade da comarca. Pero ademais de investimentos en infraestruturas, Emilio Pérez Touriño tamén quixo lembrar outras actuacións de carácter social, sanitario e educativo coas que se exemplifica o cambio que está a levar a cabo o bipartito na comarca.

Parada en A Illa

Ademais de en Vilagarcía, o Presidente da Xunta tamén estivo mañá en A Illa. Foi tamén para coñecer o estado de execución dunhas obras dependentes da Consellería de Política Territorial, neste caso as do complexo sociocultural do concello. Con el estivo de novo a responsable deste departamento, María Xosé Caride, e o arquitecto do edificio, Manuel Gallego Jorreto.

Redacción Salnés