SANXENXO > 80 millóns de euros, é a cifra final da que disporá o Concello de Sanxenxo para este ano. Os orzamentos para o 2008 chegan cun pouco de atraso pola espera ...

... de concretar partidas como a do enlace entre o Polígono Industrial de Nantes coa Autovía do Salnés, e tamén mermados con respecto ós do pasado ano, cando a cifra fora de case 120 millóns de euros. O motivo, a crise que se está afectando ó sector inmobiliario local, unha das principais vías de financiamento da localidade. Aínda así, iguálanse ós do Concello de Pontevedra.

A diminución da contía dos orzamentos non vai mermar a inversión en políticas sociais, que incrementan pola contra a súa partida con case 6 millóns de euros. As que si van sufrir un receso, son as inversións en novas infraestructuras, que se frearán neste ano. Si se van continuar porén os proxectos con partidas plurianuais que xa están en vigor, coma os campos de fútbol de Vilagonga, Sanxenxo, e Noalla, ou as garderías infantís de Vilalonga e Portornovo. Ademais, o concello tamén cofinanciará a construcción do enlace entre o polígono industrial de Nantes coa autovía do Salnés. Precisamente esta inversión foi unha das causas que motivou o atraso na elaboración dos orzamentos, que tiveron que esperar á aprobación do acordo entre Concello e Xunta.

O resultado son os presupostos que segundo o Concello van reflexar a súa aposta por un desenvolvemento sostible do urbanismo, polo que non se van malvender terreos públicos, e que non se van traducir nun aumento da carga fiscal para os veciños. En canto ó nivel de endebedamento, ten a mesma porcentaxe co do pasado exercicio, e non se asumen novos créditos nin outros sistemas de financiamento externos para sufragalos gastos.

Redacción Salnés