TAMBRE > O BNG  preguntou no Parlamento sobre a mellora das infraestruturas de comunicación na comarca de Muros-Noia. A deputada parlamentaria do BNG, Ana Pontón, informou en Noia do contido da pregunta que acaba de presentar o seu grupo para a súa resposta oral en comisión encamiñada a mellorar as vías de comunicación na comarca Muros-Noia.

Retraso histórico

Segundo os nacionalistas esta rexión padece un retraso histórico con respecto ás infraestruturas viarias, a pesar de tratarse dunha bisbarra altamente poboada e cunha importante actividade económica.

Conexión co sur

Ante esta necesidade de artellar o territorio de modo que se contribúa á dinamización económica da comarca, o BNG solicita que se realicen os estudos para comunicala coa futura autovía do Barbanza e, deste xeito, coa autopista do Atlántico.

Os nacionalistas consideran que é o momento oportuno para estudar a viabilidade desta conexión posto que aínda se está a elaborar o Plan Galego de Infraestruturas.

Esta actuación viariase sumar ó proxecto da variante interior respaldado polos nacionalistas. Dende o BNG confían en que a Consellería de Política Territorial sexa sensible ás súas demandas e o goberno inclúa a súa proposta no Plan Galego de Infraestruturas.

Redacción Barbanza