MARÍN > A Escola Naval vestiuse hoxe de gala para celebrar o día do Carme. Este ano tocoulle ós Príncipes de Asturias presidir o acto ...

... de entrega dos reais despachos ós novos oficiais. Nesta ocasión si asistiu dona Letizia, ausente o ano pasado por estar embarazada, poloq eu é a súa primeira visita a Marín como Princesa de Asturias.

Á súa chegada á Escola Naval, os príncipes foron recibidos polo presidente da Xunta Emilio Pérez Touriño e logo pasaron revista ó batallón de alumnos. Posteriormente, acompañados das autoridades galegas e dos mandos militares, Don Felipe e Dona Letizia trasladáronse ó podio para presidir a xura de bandeira dos 60 aspirantes de primeiro curso, a entrega dos reais despachos ós 166 novos oficiais e o nomeamento oficial ós militares de complemento.

Entre as personalidades que asistiron á cerimonia destacou a presidenta do Parlamento galego Dolores Villarino e a vicepresidenta do Congreso Ana Pastor. A ausencia máis significativa foi a da ministra de Defensa Carme Chacón. Coincidindo con este acto, no porto militar de Marín púidose ver ó buque escola Juan Sebastián de Elcano, un dos emblemas da Armada. Tamén estaban atracados a fragata Álvaro de Bazán e o patrulleiro Atalaya.

Redacción Salnés