RIBEIRA > Os traballadores do servizo de emerxencias do 112 – Galicia seguen en pé de guerra para conseguir unha serie de melloras laborais.

Os profesionais do 112 denuncian a precariedade laboral que están a sufir por mor da privatización deste servizo público posto que, a pesar de depender da Consellería de Presidencia, está xestionado mediante unha subcontrata. Isto provoca que non se recoñezan as súas condicións laborais posto que se lles aplica o convenio colectivo de telemárketing, con salarios moi baixos, e pola contra se lles esixen requisitos propios da prestación dun servizo público como gardas localizadas e rotación de turnos.

Subrogación

A súa demanda máis inmediata é que se recoñeza canto antes o dereito de subrogación para garantir o seu posto de traballo no caso de que a administración decida cambiar á empresa subcontratada.

Despois de manter varias reunións cos responsables da empresa e realizar diversas accións de protesta, os traballadores, fartos desta situación decidiron trasladar o seu problema á rúa na busca de que as súas peticións sexan atendidas polos responsables da Consellería.

Máis de 4.000 sinaturas

Na súa campaña de recollida de firmas, que este mércores recalou en Ribeira pero xa leva percorrida media Galicia, xa obtiveron o respaldo de preto de catro mil cidadáns. Estas sinaturas máis tódalas que consigan en próximos días serán presentadas diante da administración nun acto de protesta que convocarán en Santiago de cara ó mes de outubro.

Redacción Barbanza