PORTO DO SON > Carmen Gallego inaugurou a nova lonxa de Portosín, na que o departamento autonómico investiu 1’6 millóns de euros.

A nova lonxa vén a mellora-las instalacións portuarias existentes nesta localidade, coa finalidade de que os profesionais do mar teñan unhas mellores condicións de traballo. Coa nova edificación, ubicada en terreos gañados ao mar, quérese dotar ó porto dun espazo que substitúa á vella rula empregada ata o de agora, xa que as súas dimensións eran reducidas e insuficientes.

Tanto o patrón maior de Portosín, Eduardo Carreño, como o propia alcalde, Manuel Tomé, destacaron a importancia desta nova infraestrutura, agradecendo o investimento realizado pola Consellería de Pesca.

Máis de 2.000 metros cadrados

O novo edificio conta con dúas alturas e distribúese en dúas construcións diferenciadas: o espazo da lonxa e os departamentos de compradores, que están unidos por un corredor central. A superficie total construída é de máis de dous mil metros cadrados. Dentro do edificio da lonxa tamén se distinguen claramente dúas áreas, a de lonxa propiamente dita: zona de subhasta, instalacións frigoríficas, almacéns de caixas e garaxe e a destinada a oficinas, aseos, bar e sala de poxas-compradores, dende a cal os compradores despois de observar os produtos pesqueiros da zona de subhasta poxan por eles.

Ademais desta nova obra a Consellería de Pesca tamén está a realizar outras actuacións nesta localidade como é o caso da modernización da fábrica de xeo.

Redacción Barbanza