CAMBADOS > O Concello denunciou hoxe o estado de abandono no que se atopa a zona de concentración parcelaria de Vilariño. Hai tres anos que se abriron as pistas e desde entón os propietarios das fincas téñeno bastante complicado para traballar as terras. A maleza cobre as cunetas e moitas das fincas están a monte. E é que despois de dez anos de que se iniciase a concentración, as parcelas inda non foron entregadas, e non hai visos de que iso suceda ata 2011, polo menos.

O asunto foi debatido a pasada semana no Parlamento de Galicia. Medio Rural dixo que levaba investido nesta parcelaria millón e medio de euros, algo que nega o alcalde. Denuncia ademais que Medio Rural está a facer un negocio a costa dos veciños. Cores Tourís refírese ás masas comúns. Indica que nesta concentración hai 24, cun total de 87 mil metros cadrados. Ó rexedor non lle parece ben que boa parte desta superficie se destine a aluguer dentro do Banco de Terras.

Alcalde e a deputada autonómica Rosa Oubiña non entenden o atraso dunha concentración parcelaria de 63 hectáreas, e que mantén en vilo 352 propietarios, á espera do reparto das 501 fincas resultantes.

Redacción Salnés