VILAGARCÍA> Nenos, pais e mestres do CEIP A Escardia venderon postres caseiros para recadar fondos para os damnificados do país caribeño.

En tempos de desastres medio ambientais ou ante situacións de extrema pobreza, moitas veces son os máis cativos os que dan á poboación toda unha lección de solidariedade. E para mostra, a iniciativa dos rapaces de A Escardia. Coa axuda dos seus pais e dos mestres metéronse na cociña para elaborar estes suculentos doces que se podían mercar por cincuenta céntimos á porta do colexio. Filloas, orellas e pasteis para todos, incluso para celíacos.

A iniciativa ocorréuselle ós profesores do centro, mentres estudaban a devastación que o terremoto do pasado 12 de xaneiro deixou na capital de Haití, Puerto Príncipe. Pensaron como podían axudar ós seus habitantes dunha forma na que colaborase toda a comunidade educativa.

O certo é que todos teñen claro o porqué desta iniciativa. Desde os mais pequenos de tres anos ata os rapaces de sexto de primaria. Todo o diñeiro que conseguiran recadar durante a xornada será entregado a unha ONG infantil a finais desta semana. A organización será a encargada de facer chegar esta axuda ós habitantes de Haití.

Redacción Salnés