PONTEVEDRA> Trasona, en Asturias, acolle esta fin de semana o Campionato Europeo de Augas Tranquilas. Ata alí desprazarase un nutrido grupo de padexeiros galegos que buscan asinar un bo papel coa selección española. Hoxe, Alfredo Bea e Lete Lasa desexáronlles sorte para a competición que se inicia o venres.
{flowplayer}images/salnes/piraguismo_290610.flv{/flowplayer}
O Secretario Xeral para o Deporte da Xunta de Galicia, José Ramón Lete Lasa, e o Presidente da Federación Galega de Piragüismo, Alfredo Bea, despediron esta mañá ós padexeiros galegos que participarán no Europeo de piragüismo esta fin de semana, en Trasona. O acto celebrouse no Centro Galego de Tecnificación de Pontevedra, onde estiveron a maior parte dos deportistas.
Dentro do equipo masculino de kaiak irán Carlos Pérez xunto a Saúl Craviotto, que competirán en K-2 500 e 200. Diego Piña e Rodrigo Germade formarán parte do K-4, xunto con Borja Prieto e o asturiano Emilio Llamedo. Na categoría feminina, Teresa Portela defenderá o K-1 200 metros.
No que respecta ó equipo de canoístas, en C-1 500 e 1.000 metros sairá José Luis Bouza; en C-1 200 André Oliveira que tamén compartirá canoa na distancia 1.000 metros co seu compañeiro de clube Yeray Picallo. O Salnés estará representado no C-2 200 e 500 onde estarán David Maquieira, do Náutico O Muíño, e Jacobo Domínguez, do Breogán do Grove. Por outra parte, o C-4 queda composto polos grovenses David Mascato, Damián Ramos e Tonos Campos e o catoirense das Torres, Diego Romero.
Ademais, Lete Lasa anunciou hoxe que a Xunta de Galicia deseñará ao longo desta lexislatura un plan específico de mellora das instalacións dos clubs de piragüismo.
Redacción Salnés
