SALNÉS

A Baixada Internacional do Río Umia cumpre 30 anos de vida. A proba, unha das máis importantes da comarca, celebrarase esta fin de semana no concello de Ribadumia, organizada polo club Náutico O Muíño. Será o sábado 6 de xullo, e está previsto que participen nela máis de 350 deportistas.

O Partido Popular de Vilagarcía presenta 80 propostas para que se inclúan nos orzamentos do concello para este ano. A formación recupera moitas das ideas que levaba en campaña, coas parroquias, o emprego, o deporte e o turismo como eixos. Critican ademais que no mes de xullo o goberno local aínda non fora quen de elaborar as contas para este 2024 e reclaman que sexan uns orzamentos realistas.

O saxofonista francés Arnaud Desprez é un dos pratos fortes da edición deste ano do Festival de Jazz da Armenteira, no Concello de Meis. Vaise celebrar entre o venres día 12 e o domingo 14. Ademais deste artista francés, pola Armenteira pasarán outros moitos ao longo dos tres días de festival. Entre as propostas deste ano: Diego Nogueira Trío, Tornado Jazz Ensemble, Sizixia Quartet e Brass Atlantic.

O presidente da Xunta visitou os traballos que se están a realizar á altura de Portonovo, coa construción dun bulevar. Beirarrúas máis amplas e reforzo da seguridade viaria para, dixo Alfonso Rueda, un dos concellos turísticos máis importantes de toda España.

Partido Popular e Partido Socialista dan un paso cara o entendemento na Mancomunidade do Salnés. No dobre pleno extraordinario celebrado onte as dúas formacións maioritarias votaron a favor de crear unha comisión para o estudo dunha modificación estatutaria. O obxectivo, explicaron, é devolver o consenso perdido ao ente comarcal.

O concello de Sanxenxo traballa para que a praia de Silgar ofreza a súa mellor versión este verán. Hoxe iniciou o movemento de 10.000 metros cúbicos de area na zona leste do areal. O obxectivo: recuperar o seu perfil orixinal e amplia a zona de desfrute, despois de que os temporais do inverno desprazaran o árido á zona máis alta cubrindo pasarelas e lavapés.

Unha muller falecida e dous feridos de gravidade nun accidente rexistrado esta mañá na autovía do Salnés, á altura do concello de Meis. Todo apunta a que o sinistro foi provocado por un turismo que circulaba en dirección contraria. A colisión foi frontal entre dous vehículos, moi preto da saída do Mosteiro, nos carrís en sentido Pontevedra.

Zona Aberta de Vilagarcía lanza os Xoves Abertos. Trátase da primeira iniciativa impulsada polo colectivo deseñesada específicamente para o sector hostaleiro, logo da súa integración na asociación hai uns meses. A proposta inclúe cinco actuacións musicais dende o xoves 27 de xuño ata o xoves 25 de xullo.

A asociación Xironsa de Cambados recupera este ano o seu festival, logo de ter que cancelalo o ano pasado por falta de apoios económicos. A cita será o vindeiro sábado 6 de xullo, cunha proposta que recolle actuacións pensadas para todas as idades.

A subdelegación do goberno en Pontevedra proponlle a Vilanova a súa reincorporación ao sistema VioXén, para que a Policía Local poida colaborar na protección das vítimas de violencia de xénero. Unha proposta que o concello considerará cando haxa suficiente dispoñibilidade de axentes municipais.