Vilanova

A Mancomunidade organiza o vindeiro luns en Sanxenxo un foro centrado na estratexia a seguir para seguir atraendo visitantes á comarca fóra da tempada alta. O programa inclúe catro mesas con temáticas clave para O Salnés: Xacobeo 2027, Turismo Deportivo, Turismo Náutico e Enogastronomía. O foro estará conducido polo xornalista Pedro Piqueras. Das 80 prazas dispoñibles xa se cubriron a metade.

Fin de semana de troula na parroquia vilanovesa de Caleiro. Este sábado vaise celebrar a Festa de San Isidro O Labrego. Unha cita na que ademais de música e gastronomía, a parroquia presume de tractores. Como é tradición, celebrarase o desfile de maquinaria, no que se agarda a participación duns vinte tractores. Na comisión tamén poñen o foco no desfile de tractores infantil, para que os máis pequenos da volta manteñan a tradición no futuro. O domingo, mentres, celebrarase a quinta Xuntanza de San Isidro nos Muíños de Currás.

Este ano fixéronse agardar, pero xa están aquí. Os mozos da comisión de Festas de Caleiro, en Vilanova, xa teñen todo listo para a festa de San Isidro Labrador deste vindeiro sábado. Como xa é tradición, para desvelar o cartel publicaron a través das súas redes un vídeo. Este ano seica andaban un pouco desaparecidos, a ver se libraban de facer a festa. Ao final houbo que recorrer a unha das veciñas máis célebres da zona para dar con eles.

A Mancomunidade do Salnés quere darlle un impulso ao turismo de autocaravanas. O organismo comarcal acaba de presentar un plan para crear áreas nos concellos do interior. A idea é desconxestionar os municipios costeiros fomentando este tipo de turismo en concellos como Meis, Ribadumia ou Meaño. Segundo os cálculos da Mancomunidade precisaríanse unhas 300 prazas para dar resposta a toda a demanda.

Arrancan as obras do novo centro de talasoterapia do Terrón, en Vilanova. O proxecto agrupa nun mesmo complexo equipamentos deportivos e acuáticos. O futuro edificio con dous vasos e distintos servizos nun edificio de tres andares. Esta fase do talaso conta cun orzamento de 1,8 millóns de euros, dos que a Deputación de Pontevedra achega o 50% a través do Plan Extra. Este luns visitaron a zona o presidente provincial e membros do goberno local.

A Asociación O Castro de Baión, en Vilanova, organizou este xoves a I xornada sobre Idadismo e Lonxevidade. O colectivo quixo abordar este problema, poñendo o foco en especial na soidade non desexada. No Castro defenden a necesidade de promover o envellecemento activo dende todos os niveis da sociedade. Na xornada estiveron presentes todos os concellos do Salnés.

Vilanova é un concello coa economía saneada. Así o asegura o seu goberno local despois de que se aprobara a liquidación do orzamento do 2025. O exercicio pasado rematou para o concello vilanovés cun aforro neto de 2,5 millóns de euros e 4,5 millóns de débeda a longo prazo. De feito, o alcalde adiantou que a intención é solicitar a extinción do Plan de Saneamento que controlaba o endebedamento municipal dende o 2012. Agora a idea de Gonzalo Durán é que esta boa saúde económica se traslade aos veciños en forma de novos investimentos.

Ata o vindeiro seis de abril está aberta a nova convocatoria de axudas Leader que xestiona o GDR Salnés-Ulla-Umia. Poden optar a estes fondos proxectos que favorezan o desenvolvemento de zonas rurais, que fomenten o asentamento de poboación ou xeren postos de traballo. Destes fondos pódense beneficiar empresas e autónomos, pero tamén asociacións, comunidades de montes e os propios concellos. A gran novidade desta edición é que a convocatoria pasou de dúas a tres anualidades.

A situación do marisqueo en Vilanova de Arousa é crítica. Así o trasladou o sector á conselleira do Mar. Marta Villaverde desprazouse hoxe ata o banco marisqueiro das Sinas para supervisar o traballo de recollida de mostraxes que permitan avaliar o impacto dos temporais deste inverno. Na confraría vilanovesa son claros: o marisco está morto e xa hai moitos mariscadores sen ingresos.

A Mancomunidade do Salnés ten preparado xa o proxecto para a reforma do que será o futuro Centro Loxístico Multiservizos. Trátase dunha infraestrutura estratéxica para a comarca que aglutinará distintos servizos mancomunados, como o parque de maquinaria ou espazos formativos. A transformación desta nave, situada no polígono de Sete Pías, está orzamentada en 600.000 euros. O organismo comarcal acaba de conseguir unha axuda da Xunta pola metade dese importe.