RIBEIRA> O BNG de Ribeira demanda un mellor mantemento das tapas dos sumidoiros que están a provocar problemas en varias vías do municipio. Unha das zonas máis afectadas é o barrio de Deán Pequeno onde ademais de molestos ruídos, o mal estado dos sumidoiros supón un risco para a seguridade viaria.
O mal estado do firme xunto co deficiente encaixado das tapas dos sumidoiros está a xerar numerosas queixas na estrada que discorre por Deán Pequeno ata o cruce co acceso a Xarás. O principal problema son os ruídos que teñen que soportar os veciños tanto de día como de noite posto que se trata dunha vía moi transitada non só por turismo senón tamén por vehículos pesados que se dirixen ó centro loxístico de Congalsa emprazado na zona.
Ademais das molestias sonoras, a acumulación de tapas de sumidoiro concretamente no cruce coa vía que conecta con Xarás supón un serio risco para a seguridade dos condutores posto que dificulta a adherencia das rodas, especialmente cando chove.
O BNG recolleu as queixas veciñais para trasladarlle ó goberno a necesidade urxente de tomar medidas, apostando por un mellor mantemento das infraestruturas básicas en tódalas parroquias, especialmente no rural xa que moitos núcleos, din, están en práctico estado de abandono.