BOIRO> O concello de Boiro está a acometer unha serie de actuacións por todo o municipio para reforzar a seguridade viaria. Ademais de executar melloras na contorna dos centros educativos, implantouse o sentido único en varias rúas do casco urbano.
Ademais da campaña de control de tráfico que está a desenvolver a Policía Local de Boiro para reducir a sinistralidade, o concello acometeu unha serie de actuacións encamiñadas a incrementar a seguridade dos condutores e dos peóns. O reforzo da sinalización, alumeado e instalación de redutores de velocidade realizouse principalmente en vías secundarias e na contorna de centros escolares.
Tamén se acometeron actuacións similares nas inmediacións do colexio de Escarabote e da Galiña Azul e están a piques de comezar as obras na contorna do CEIP Santa María do Castro e no instituto de Espiñeira con cargo ó POS da Deputación da Coruña.
No que respecta ó centro de Boiro tamén se acometeron cambios na rúa Nova e no Corrillo que pasaron a ser dun único sentido para a posta en valor do antigo Ca,iño real polo que discorre a Ruta Xacobea A Orixe.
Estes cambios dan continuidade ós xa implantados na rúa Cruceiro onde tamén se habilitou unha zona de estacionamento nunha parcela adquirida polo concello en réxime de alugueiro.