crb

A Plataforma en Defensa da Sanidade Pública do Barbanza valora positivamente, aínda que con cautela, a xuntanza mantida cos responsables da  área sanitaria. Son varias as especialidades nas que xa se están a tomar medidas, como a incorporación de medios técnicos e humanos, para reducir as listas de espera.

Uns 250 deportistas daranse cita este domingo en Ribadumia na sexta edición da XCO Kiwi Atlántico. Trátase dunha proba de mountain bike cun percorrido técnico que organiza o Club Ciclista Ribadumia pola contorna desta empresa. De feito, as súas instalacións forman parte do percorrido. Este ano a proba é puntuable para o campionato galego.

O Portonovo Gastronómico segue medrando. 21 establecementos, dous máis ca o ano pasado, participan este ano nesta cita impulsada polo Concello de Sanxenxo. Na ponte do 1 de maio, a localidade ofrecerá unha completa variedade de tapas, todas elas coa raia como protagonista. Ademais, salienta tamén o reforzo da programación paralela, co regreso do Raia Rock, un concerto de Treixadura ou un festival de baile con varias agrupacións locais.

Coincidindo coa conmemoración do Día Mundial da Atención Primaria, o Barbanza sumouse á convocatoria de mobilización de SOS Sanidade Pública para toda Galicia. Esixen máis medios e recursos para garantir unha asistencia de calidade en primaria, evitando así sobrecargar o sistema.

O BNG de Ribeira demanda ó goberno que habilite unha partida para castración de colonias felinas. Neste sentido, demandan que lle dean continuidade ó traballo desenvolvido durante o seu mandato na área de Benestar Animal.

Ribadumia celebra a súa primeira Mesa fronte a Violencia de Xénero. Trátase dunha ferramenta de coordinación entre os distintos actores implicados na loita contra esta lacra. Na xuntanza participaron representantes da administración a distintos niveis, Garda Civil e membros da comunidade educativa do municipio e do eido da saúde. Neste tipo de mesas faise unha radiografía de cal é a realidade do concello no referente á violencia de xénero, que necesidades presenta e que medidas cómpre tomar para o fomento da igualdade.

A situación do marisqueo en Vilanova de Arousa é crítica. Así o trasladou o sector á conselleira do Mar. Marta Villaverde desprazouse hoxe ata o banco marisqueiro das Sinas para supervisar o traballo de recollida de mostraxes que permitan avaliar o impacto dos temporais deste inverno. Na confraría vilanovesa son claros: o marisco está morto e xa hai moitos mariscadores sen ingresos.

Vilagarcía anima á veciñanza a alimentar un comelixo. O concello pon en marcha unha nova campaña para fomentar a separación de residuos. Salientan que na cidade cada vez se recicla máis e mellor, pero que cómpre seguir dando pasos. Destacan a importancia de separar o lixo para evitar que os custes suban, porque -lembran- as novas normas penalizan todo o lixo que chega mesturado a Sogama.

O Partido Socialista de Pontevedra reclama a Xunta e a Deputación que se poñan dacordo para renovar o céspede e o sistema de drenaxe do Estadio de Pasarón. O voceiro socialista asegurou que ata o de agora as actuacións que se realizaron foron parches que non evitaron os continuo alagamento do terreo de xogo. Segundo os cálculos de Iván Puentes, o investimento roldaría os 500.000 euros.

Menos accidentes pero máis graves. É o balance que deixa o 2025 nas estradas interurbanas da provincia de Pontevedra. Segundo os datos presentados hoxe na Subdelegación do Goberno, durante o ano pasado houbo menos falecidos pero máis feridos graves. Tamén destacan o elevado número de imprudencias detectadas ao volante.