PONTEVEDRA

A de Pontevedra foi a provincia onde máis incidencias se rexistraron, unhas 300 das máis de 550 que contabilizou o 112 Galicia relacionadas con esta borrasca. Ningún concello da nosa contorna se librou do paso de Kirk, deixando danos en tódolos municipios, aínda que por fortuna, de escasa consideración. En Barro o vento provocou a caída de varios paneis do pavillón de Curro, mentres que en Poio levou por diante un chiringuito da praia de Lourido. Ademais, houbo que suspender as clases en varios centros educativos.

O paso do temporal Kirk tamén se deixou notar con forza en Pontevedra. Na cidade, rexistráronse decenas de incidencias durante a madrugada e as primeiras horas da mañá. Así as cousas, ningunha deixou consecuencias de gravidade para as persoas. Foron principalmente caídas de árbores que, nalgúns casos, obrigaron a cortar vías de circulación. Parques, xardíns e outras zonas arboradas continuarán pechadas, alomenos ata mañá.

Pontevedra prepárase para intentar minimizar os efectos de Kirk, os restos dun furacán tropical que chegarán mañá mércores ás Rías Baixas. Esta mesma tarde, o concello pechou os espazos abertos e con árbores, como os parques infantís ou a Alameda, ante a posibilidade de que os fortes ventos e chuvias que se agardan provoquen caída de árbores e pólas. Tamén preocupan posibles asolagamentos en diferentes puntos sensibles da cidade. A AEMET ten decretada a alerta laranxa para mañá, mércores.

> O altar da Virxe dos Desamparados abandonará a igrexa do convento de Santa Clara de Pontevedra. A orde das clarisas solicitou o seu traslado a Santiago e xa contan co visto bo da Dirección Xeral de Patrimonio. Dende o goberno da Deputación, o seu vicepresidente responsabiliza ao alcalde da cidade. Para Rafa Domínguez, no momento da compra Miguel Anxo Fernández Lores firmou o maior espolio cultural da historia pontevedresa ao permitir que estas pezas seguiran sendo propiedade da igrexa. As clarisas levarán o altar da Virxe dos Desamparados para Santiago. A peza, que actualmente está na igrexa do convento de Santa Clara, foi reclamada pola orde relixiosa. Para o vicepresidente da Deputación, o responsable desta situación é o alcalde de Pontevedra. Rafa Domínguez critica que no contrato de compravenda se reservara á orde relixiosa a opción de reclamar os retablos da igrexa antes de rematar o 2025. Polo que poderían levar tamén o altar maior, valorado en 126.000 euros, os laterais, o púlpito, o coro ou o órgano, cun valor calculado nos 135.000 euros. Domínguez recordou tamén que froito do contrato de compravenda asinado polo concello de Pontevedra, as clarisas levaron xa 18 pezas relixiosas no momento de deixar o convento. O traslado do altar da Virxe dos Desamparados xa conta co visto bo da Dirección Xeral de Patrimonio da Xunta de Galicia e a orde relixiosa ten 20 días dende hoxe para levar a cabo o traslado. Está valorado en 74.000 euros e a intención das clarisas é mantelo para o culto.

O vindeiro 6 de outubro conmemórase o Día Mundial da Parálise Cerebral. Pero en Amencer-ASPACE adiantaron a hoxe a celebración. Escolleron un dos espazos comúns da súa nova residencia no Centro Sur como escenario do acto conmemorativo. Unha cita que aproveitaron para reclamar máis recursos especializados para atender o envellecemento das persoas con parálise cerebral. O lema: ‘Envellecer. Decidir.Vivir”.

O viveiro de empresas da Deputación de Pontevedra no polígono de Barro segue medrando. O goberno provincial aprobou hoxe a cesión de catro novas oficinas e outras tantas naves nestas instalacións. Ademais, decidiu prorrogar varios proxectos que se están desenvolvendo nestes momentos neste espazo. Unha ferramenta, lembran dende a Deputación, que serve para dar apoio a novos emprendedores.

A Xunta de Galicia investirá 4 millóns de euros en actuacións para a mellora do saneamento da ría. Esta mañá, a Conselleira de Medio Ambiente asinou un convenio co concello de Poio, que achegará o 10% do orzamento. As obras realizaranse no seu termo municipal, incluíndo a construción dun tanque de tormentas na zona da Seca. A intención é licitar o proxecto este ano e comezar as obras no 2025.

O teatro e a danza fanse un oco na aposta cultural da Deputación de Pontevedra. Hoxe presentouse +Escénicas, o primeiro circuíto da provincia dedicado a estas artes. No seu marco, púxose á disposición dos concellos pontevedreses de menos de 20.000 habitantes un catálogo con obras de case 300 compañías galegas.´

O folga do estudantado galego convocada pola organización Erguer tivo o seu eco na cidade de Pontevedra. Ao mediodía e baixo a chuvia, un grupo de mozos e mozas concentrábase para reclamar o seu dereito á vivenda. Aseguran que a situación é insostible. Segundo os convocantes, nos centros públicos pontevedreses o seguimento da folga roldou o 80%.

O PSdeG reclama en Pontevedra que a Xunta execute a comprometida dragaxe do río Lérez. Nunha visita á cidade, José Ramón Gómez Besteiro asegurou que vixiará dende o Parlamento o cumprimento do que cualificou como unha débeda histórica con Pontevedra. O secretario xeral dos socialistas galegos apuntou que a actuación desapareceu dos orzamentos autonómicos dende o 2022, e reclamou que se inclúa unha partida nas contas do 2025.