Sanxenxo

Este xoves celebrouse a Xunta Local de Seguridade, na que o subdelegado do goberno comprometeuse a incrementar a presenza da benemérita en datas clave no municipio en eventos masivos. No encontro tamén se destacou que Sanxenxo é un concello 'extremadamente seguro', cunha diminución no número de delitos de máis dun 4% no último ano.

A praza do Mar acolle dende este xoves a terceira edición dun congrso organizado polo IES Vilalogna e o CIFP Fontecarmoa. Durante dúas xornadas por aquí pasarán expertos de distintos sectores para abordar as últimas tecnoloxías da automoción. Máis de 250 alumnos de FP de Automoción de toda Galicia participan no encontro.

A Mancomunidade do Salnés rodéase de expertos para buscar as claves cara a desestacionalización turística. Hoxe o Real Club Náutico de Sanxenxo acolleu o Foro de Turismo, unha cita dirixida a analizar as diferentes potencialidades da zona para atraer visitantes tamén fóra da tempada alta.

O Sanxenxo degusta Tapas sigue medrando. 26 establecementos van partircipar este ano nesta proposta gastronómica, que acada a súa décimo quinta edición. A cita, organizada polo concello de Sanxenxo, vaise celebrar dende esta venres a ata o 7 de xuño. As tapas terán un prezo único de 4 euros.

A Mancomunidade organiza o vindeiro luns en Sanxenxo un foro centrado na estratexia a seguir para seguir atraendo visitantes á comarca fóra da tempada alta. O programa inclúe catro mesas con temáticas clave para O Salnés: Xacobeo 2027, Turismo Deportivo, Turismo Náutico e Enogastronomía. O foro estará conducido polo xornalista Pedro Piqueras. Das 80 prazas dispoñibles xa se cubriron a metade.

Sanxenxo é o escenario escollido para un estudo pioneiro a nivel estatal. A Universidade de Vigo analizará o perfil físico e sociocognitivo dos veciños maiores de 65 anos. O estudo, financiado polo concello e a Xunta de Galicia, busca analizar o seu estado de saúde, a autonomía e o benestar social, co obxectivo de promover políticas e programas orientados ao envellecemento activo e saudable.

A balaustrada de pedra seguirá en Silgar. O alcalde de Sanxenxo aclarou este martes as dúbidas sobre o proxecto de reforma do paseo marítimo. Telmo Martín apunta que se fará un reforzo da varanda con elementos de aceiro inoxidable nos últimos 120 metros do paseo para cumprir a normativa de seguridade. O rexedor dálle así carpetazo á polémica xurdida na vila, garantindo que non se van retirar as partes de pedra. A pesar de que no primeiro anuncio do concello se falaba de 'substitución', o alcalde tacha de 'bulos' as informacións que apuntaban á súa retirada.

 A Xunta abordará en Sanxenxo un novo Proxecto de Interese Autonómico para impulsar en Vilalonga a construción de  350 vivendas, a maioría protexidas. A conselleira de Vivenda e e o alcalde asinaron este martes a concesión dun préstamo do Fondo de Cooperación da Xunta por importe de 3,5 millóns de euros. Cantidade que lle permitirá ao concello adquirir os terreos, a maioría propiedade da Sareb, para cederlle logo ao goberno galego.

A explotación do novo emisario de Montalvo xa depende do concello de Sanxenxo. A cesión desta infraestrutura formalizouse esta mañá cunha sinatura na que participaron os alcaldes Telmo Martín e Ángel Moldes, de Poio, e os responsables da empresa pública estatal Acuaes. Trátase dunha peza clave para solucionar os problemas de saneamento dos dous municipios. A construción deste emisario contou cun orzamento de 3,7 millóns de euros, incluídos nun investimento total de 24 millóns para mellorar a calidade das augas da ría de Pontevedra.

Comisións Obreiras e persoal do servizo de Emerxencias e Protección Civil de Sanxenxo denuncian acoso laboral no concello. Sinalan directamente ao alcalde, Telmo Martín, ao que acusan de utilizar métodos coercitivos para silenciar as demandas de mellora de medios e seguridade feitas polos traballadores. A pinga que encheu o vaso foi a apertura de varios expedientes disciplinarios por faltas moi graves. O sindicato advirte: se non se retiran, comezarán as mobilizacións. E pensan xa no verán.