Vilanova

Encontro clave entre a Mancomunidade do Salnés e o empresariado chinés no marco de Fitur. O organismo comarcal organizou un acto en Madrid ao que tamén asistiu o embaixador chinés en España. A cita serviu para seguir promocionando o destino máis alá do verán. De aí a importancia do mercado chinés, caracterizado por viaxar fóra da tempada alta. O presidente da Mancomunidade aproveitou o acto para convidar ao embaixador chinés a visitar O Salnés este ano.

Arousa volve ser o escenario dun novo operativo contra o tráfico de drogas. Dende primeira hora desta mañá, a Policía Nacional está a levar a cabo rexistros en varios concellos, entre eles Ribadumia e Vilanova de Arousa. A intervención está a ser dirixida por un xulgado de Santiago e, segundo explican dende a Subdelegación do Goberno en Pontevedra, dá continuidade a un realizado hai semanas noutra comarca galega. Fontes da investigación apuntan a que hai varios detidos.

Nova xornada de folga das traballadoras da limpeza do Hospital do Salnés. Reclaman equiparación de salarios e condicións ao resto de hospitais do SERGAS. Ao longo deste mes están a convocar paros de dúas horas por cada quenda os martes e mércores, xunto coas compañeiras dos hospitais do Barbanza e de Cee, que tamén se atopan na mesma situación.

Primeira das tres xornadas de concentracións diante dos centros de saúde e PACs de toda Galicia en defensa da atención primaria, pola falta de persoal e a incapacidade de xestión da Xunta. En Vilanova, por exemplo, estiveron presentes representantes da CIG, CSIF, CCOO e UXT. Os catro sindicatos van da man nestas protestas, que repetirán este mércores e xoves. Son mobilizacións previas á folga que convocaron para o vindeiro día 26.

O Pazo de Vista Real, en Vilanova, pasou de ser un emblema do narcotráfico en Arousa a unha referencia no eido do apoio ao emprego. O concello adquiriuno no 2010 e dende hai 10 anos, entre outros usos, é a sede do Centro de Desenvolvemento Local de Vilanova. Un espazo de apoio ao emprego e ao emprendemento, polo que nesta década pasaron milleiros de persoas.

Xornada arredor da dixitalización do sector turístico no Polo de Emprendemento de Vilanova. Nesta acción formativa participaron algúns dos emprendedores que reciben asesoramento neste servizo que a Xunta ten no Pazo de Vista Real. Un espazo no que continúan achegándose persoas que teñen en mente a creación ou expansión dun proxecto.

A Xunta pon de relevo o emprendemento feminino no marco do labor do polo de Vilanova de Arousa. As instalacións do Pazo de Vista Real recibiron hoxe a visita da directora xeral de Traballo Autónomo e Economía Social. Marta Mariño destacou que o polo vilanovés leva atendido máis de 200 proxectos. Deles, o 58% están impulsados por mulleres.

Os conselleiros do Mar e Facenda asinaron hoxe un convenio de colaboración entre os seus departamentos para o desenvolvemento dun sistema de información relacionada cos bancos marisqueiros. Un novo sistema no que se van investir 185.000 euros que permitirá tomar decisións baseándose en datos científicos e técnicos.

A Asociación Cultural O Castro ofrecerá actividades de acompañamento e animación cultural no Hospital do Salnés. Esta mañá, o presidente desta asociación con base en Vilanova e o xerente da área sanitaria asinaron un convenio. Este acordo vaise traducir en que voluntariado da asociación prestará o seu apoio ás persoas ingresadas que o precisen, en especial, grupo vulnerables como persoas maiores ou xente que viva soa.

A Mancomunidade do Salnés segue formando futuros traballadores do sector do viño. Esta mañá tivo lugar a clausura dunha nova edición do seu Curso de Elaboración de Viños, unha iniciativa que forma parte do seu programa integrado de emprego. Oito alumnos participaron nesta acción, centrada nas técnicas de cultivo, elaboración e conservación de viño e catas. O obradoiro tivo unha duración de 50 horas repartidas entre Pazo Baión e unha adega de Castrelo.