RIBEIRA> Esta semana comezaban as obras de restauración da antiga fábrica de salgadura do Touro en Ribeira. Esta actuación forma parte do proxecto ‘Viaxe a través dos sabores’ que promove a Mancomunidade Barbanza Arousa no marco do Plan de Sostinibilidade Turística en Destino. Os traballos consistirán na consolidación e rehabilitación da antiga factoría, secadoiro de polbo e vivendas, así como a súa musealización.
O presidente da Mancomunidade de Municipios Barbanza Arousa, xunto co alcaldesa de Ribeira, visitaba esta mañá as obras de restauración que se están a acometer na fábrica de salgadura do Touro. A cooperativa Árbore é a encargada de poñer en valor este espazo para facelo accesible e interpretable ós visitantes.
A factoría do Touro forma parte da ‘Viaxe a través das historia dos sabores’ que propón Barbanza Arousa con parada nos catro concellos que a compoñen.
Con este proxecto, a Mancomunidade busca adaptarse ás novas tendencias turísticas consolidando o destino como un referente enograstronómico.
Prevese que tódalas actuacións enmarcadas no PSTD estean rematadas a 30 de xuño polo que entrarán en servizo este mesmo verán.
