Barbanza - Muros - Noia

O concello de Ribeira contestará ó cuarto requirimento de Portos de Galicia para autorizar a instalación das atraccións no recheo. Aínda así, dende o executivo critican as esixencias do ente autonómico demandando estudos pormenorizados nunca antes requiridos.

Outes acollerá os días 1, 2 e 3 de agosto a primeira edición do Master Nacional de Futbolín. O torneo está organizado pola asociación A Riola, en colaboración co Concello, e nel agárdase unha participación dunhas 130 parellas chegadas dende diferentes localidades galegas e tamén do resto do ámbito nacional.

Tralo éxito da súa primeira actuación o pasado ano, Rafael Álvarez ‘El Brujo’ volta a Ribeira. Será o 18 de outubro cando recale novamente no auditorio municipal con ‘El viaje del monstruo fiero'. As entradas sairán á venda o próximo luns.

Presentadas na Pobra as festas do Carme do Castelo. A cita, coa que se inaugura o calendario festivo na localidade, desenvolverase do 18 ó 20 de xullo, cun programa completo con propostas para tódolos públicos. Un dos pratos fortes do programa será de novo o Festival Folk que chega este ano a súa novena edición e que incluirá o concerto de Sés.

A praza do emigrante da Pobra foi escenario da entrega de premios Merca no teu comercio. Os agraciados nesta campaña desenvolvida tanto no concello pobrense como en Porto do Son, recolleron os seus vales por valor de 50 euros para consumir no comercio local.

A CIG denuncia a falla de cobertura de prazas en atención primaria durante o verán. As delegadas na comarca do Barbanza alertan de que a situación non afecta unicamente ó persoal médico senón tamén a técnicos de enfermería, matronas ou fisioterapeutas.

Segue a polémica pola autorización das festas en Ribeira. Portos envioulle esta mesma mañá ó Concello un novo requirimento para que achegue diversa documentación para poder tramitar a autorización necesaria para a celebración das festas no porto en condicións de seguridade para as persoas e para as propias instalacións portuarias. Segundo sinalan dende o ente autonómico dependente da consellería do Mar, trátase do cuarto requirimento realizado logo dos envíos de documentación incompleta, errónea ou non válida por parte da Administración Local.

A aldea de Ces, en Lousame, vivirá esta fin de semana as súas festas grandes. Ademais da sardiñada popular do domingo, a estrela do cartel será a orquestra Panorama que animará a verbena do luns.

Os praceiros do mercado de Noia piden ó concello que axilice os trámites para retomar as obras de reforma da instalación. Os traballos permanecen traballos ocasionando numerosas molestias a usuarios e traballadores, especialmente ós propietarios dos postos que tiveron que se reubicados.

A parroquia de Aguiño quenta motores para acoller as súas festas na honra da Virxe do Carme. Catro xornadas de celebracións cun amplo programa para tódolos públicos no que a procesión marítima será o acto central.