BARBANZA> A piques de concluír a tempada estival, o balance do servizo de socorrismo nas praias do Barbanza é positivo. Foron poucas as incidencias graves nos areais da bisbarra a pesar da gran afluencia de bañistas. As intervencións máis habituais consistiron en curas de feridas, cortes ou picaduras.
A mediados de setembro, a maior parte das praias do Barbanza deixarán de contar con servizo de socorrismo. A poucos días de rematar a tempada, o balance é bastante positivo posto que non se rexistraron afogamentos, nin sequera nas praias máis perigosas de mar aberto como é o caso das Furnas.
Á marxe das caídas na zona de cantís, as principais incidencias son de carácter leve e están relacionadas con picaduras ou cortes.
Aínda así, os socorristas aconsellan non baixar a garda e lembran ós bañistas a importancia de seguir as súas indicacións para evitar asumir riscos innecesarios e gozar de xornadas tranquilas nas praias.
