BOIRO > Dende que a Consellería de Presidencia fixo pública a redistribución prevista para os GRUMIR as reaccións deste servizo non se fixeron agardar.
{flowplayer}barbanza/grumir.flv{/flowplayer}
O descontento e a incerteza instaláronse nas sedes dos servizos de Protección Civil despois de que a Consellería de Presidencia fixera pública a redistribución prevista neste corpo o pasado 17 de marzo. A intención é suprimir o servizo naqueles concellos que contan con parque de bombeiros, como Ribeira e Boiro, e reubicar o persoal en novas unidades de seis efectivos nos concellos de Rianxo e Muros.
Servizo eficaz
Os afectados non vén lóxico nin necesario este replantexamento posto que, coa actual distribución, están a prestar un servizo eficaz, avalado polo número e dimensión das intervencións que rexistran cada ano.
Antes de iniciar as mobilizacións e outras medidas de presión, os membros dos Grumir optarán pola vía do diálogo solicitando a creación dunha comisión paritaria, integrada tamén polos afectados para estudar cada caso, un por un.
Ribeira e Boiro non son os únicos afectados posto que o Grumir de Noia, aínda que non será suprimido, verase reducido de 15 a nove integrantes, coas dificultades que conleva a organización de gardas e o reparto de tarefas cando coinciden varias intervencións.
Futuro incerto
A tan só uns días da finalización dos contratos os membros deste corpo descoñecen aínda o seu futuro. O que si teñen claro é que, tanto dende a Fegamp como da propia Xunta de Galicia, non se está a ter en conta o esforzo realizado por este servizo nos últimos anos en actuacións moi complicadas como o recente incendio da factoría Congalsa, a catástrofe do Prestige ou a vaga de incendios de agosto de 2006.
Redacción Barbanza