SALNÉS> Así o refliten os datos feitos públicos polo Servizo Galego de Saúde sobre a actividade do Hospital do Salnés no primeiro trimestre deste ano.
{flowplayer}images/salnes/ListasHospitalSalnes.flv{/flowplayer}
Os datos de actividade feitos públicos polo Servizo Galego de Saúde sobre o primeiro trimestre deste ano revelan, segundo a Consellería de Sanidade, que a Xestión Integrada do Servizo Galego de Saúde en Pontevedra e O Salnés logra que ambos hospitais se manteñan destacados dentro dos obxectivos asistenciais que propón a administración autonómica.
A día de hoxe a espera media cirúrxica para pacientes en Prioridade un é de 9,4 días. E volve a superarse o compromiso da Consellería de atender ós pacientes máis graves en menos de 30 días. Se nos fixamos na media de espera cirúrxica de carácter xeral, no Hospital do Salnés sitúase nos 33 días. Unha cifra que mellora considerablemente con respecto ós 47 días que rexistraba o hospital arousán no primeiro trimestre do ano pasado, do 2011.
En canto ás consultas externas, a media de demora reduciuse nun día con respecto ó ano pasado. Nos primeiros tres meses do 2011 situábase en 27 días, mentres que nestes momentos está en 26. E esta mellora é aínda superior se atendemos ás consultas preferentes, na que ascende a tes días. De 13 a 10.
O centro sanitario arousán atendeu entre xaneiro e marzo do 2012, 9.119 urxencias, cunha media de 100 asistencias deste tipo ó día. Así mesmo, un 10 por cento deses pacientes requiriron posteriormente un ingreso hospitalario.
Se facemos referencia ó rendemento dos quirófanos neste mesmo período que ven de rematar, mantívose a produtividade, ata acadar o 76,9 por cento. Unha cifra que sitúa ó Hospital do Salnés por enriba do rendemento cirúrxico global nos hospitais da rede asistencial do SERGAS, que ó rematar o 2011 atopábase nun 73,70 por cento.
Redacción Salnés
