PONTEVEDRA> Doce concellos adheridos ó Plan Revitaliza contarán a partir de mediados de novembro con mestras e mestres composteiros propios para atender os centros de compostaxe comunitaria e dar asesoramento á veciñanza.
Esta mañá tivo lugar no Pazo Provincial o acto de adxudicación de destinos ás persoas coas mellores cualificacións do proceso selectivo realizado pola Deputación. Os seleccionados pasarán a formar parte dos planteis municipais. Con este paso, avánzase na consolidación do Plan Revitaliza, que apunta cara á autonomía dos concellos no desenvolvemento do programa.
En total foron 12 os concellos que solicitaron un mestre composteiro.
A Deputación farase cargo do 100% do custe da contratación durante o que resta do 2018, do 50% no 2019, e do 30% no 2020.
César Mosquera indicou que seguen a adherirse novos concellos ó Plan Revitaliza. Nestes momentos son 36, pero prevé acabar o mandato con preto de 50.
O persoal que recibirán os concellos foi formado na “Facultade de compostaxe” e dispón dos coñecementos e cualificación para seguir traballando na difusión deste tipo de tratamento de residuos.
