Barbanza - Muros - Noia

A Deputación da Coruña subvencionará a renovación do campo de fútbol de Cabanetán, en Lousame. A actuación, cun orzamento de máis de 200 mil euros, suporá unha importante mellora na instalación deportiva.

Rianxo e Boiro traballan de xeito conxunto na habilitación dun centro de acollida de animais abandonados. O proxecto, para o que buscan financiamento, forma parte da nova liña de colaboración iniciada dende a Mancomunidade Barbanza Arousa, co fin de optimizar os recursos públicos e abaratar custes.

En Ribeira, o concello e as forzas da orde seguen a traballar conxuntamente para garantir a seguridade veciñal tralos últimos episodios delitivos rexistrados no municipio. A alcaldesa, María Sampedro, mantivo un encontro coa policía local que reforzará a vixilancia naqueles puntos máis conflitivos.

Os usuarios de AMBAR tiveron ocasión de explorar a diversidade dos fondos mariños a través dunha experiencia inmersiva promovida pola Deputación da Coruña. Trátase do obradoiro ‘Mergullando sen nos mollar’ desenvolvido pola cooperativa ’13 Grados’

Mar analizou cos patróns maiores da ría de Muros-Noia a situación dos bancos marisqueiros afectados pola alta mortaldade de marisco a consecuencia dos temporais. Na xuntanza na que participou a directora xeral de Desenvolvemento Pesqueiro, Ángeles Suárez, buscáronse solucións conxuntas para dar resposta ás necesidades do sector.

Os pais do CEP Xosé María Brea Segade de Taragoña concentráronse esta mañá ás portas do centro para demandar melloras educativas. Ademais do blindar o profesorado acadado tras anos de protestas esixen un orientador a tempo completo, máis especialistas en AL e melloras nas instalacións para reforzar a seguridade do centro.

Rianxo segue a dar pasos de cara a renovación integral do seu alumeado público. O goberno de Julián Bustelo ten previsto acollerse a unha nova subvención do Instituto para a Diversificación e Aforro da Enerxía, o IDAE,  e renovar así parte das luminarias aínda pendentes. Neste caso a zona de actuación será o casco urbano.

O BNG presentou unha serie de preguntas no Parlamento ante a alta mortalidade de marisco rexistrada no que vai de ano. Ademais de volver demandar a elaboración dun protocolo de baleirado de encoros, os nacionalistas aluden á necesidade de contar cun seguro colectivo fronte á perda de produtividade así como máis capacidade de produción de semente.

Trala recente rotura da balsa de Monte Neme, o BNG volve alertar do risco inminente que supoñen as presas de San Finx en Lousame. Piden á Xunta de Galicia celeridade na restauración ambiental da contorna da mina así como que esixan responsabilidades á empresa responsable a pesar de ter caducado a concesión.

Satisfacción no concello de Ribeira tralo acordo entre a FEGAMP e a Xunta de Galicia para incrementar o financiamento autonómico do Servizo de Axuda no Fogar. O Goberno Galego aportará 16 euros a hora, o que suporá un respiro para as arcas municipais.