A POBRA> A Pobra ofrece esta Semana Santa unha alternativa de ocio para os visitantes. As actividades relixiosas complementaranse cunha oferta de turismo mariñeiro, patrimonio e ocio para tódolos públicos.
A programación deseñada polo departamento de Turismo da Pobra para esta Semana Santa busca ofrecer unha alternativa de lecer ós veciños e visitantes ó tempo que pon en valor o patrimonio cultural, histórico e natural do municipio.
Desenvolverase un obradoiro de marisqueo o 1 de abril na praia dos Areos mentres que o xoves os máis pequenos gozarán dunha xornada de xogos tradicionais no Cantón da Leña. Durante a fin de semana terán lugar dúas rutas guiadas: o sábado ofertarase polo río Pedras e o domingo polo barrio industrial dos Ares.
Tódalas actividades, agás os xogos tradicionais, requiren inscrición previa que se pode formalizar na oficina de Turismo da Casa Mariñeira.
