Barbanza - Muros - Noia

A Xunta mellorará os equipamentos da piscina municipal de Outes. Esta mañá o conselleiro da Presidencia, Xustiza e Deportes, Diego Calvo, e o alcalde da localidade, Fran Calo, asinaban o convenio de colaboración que permitirá realizar as actuacións, cun investimento duns 73 mil euros, dos que a Xunta aportará o 90%.

A asociación cultural Peñas Boiro promove unha cea solidaria en favor de ASANOG, a Asociación de Axuda a Nenos Oncolóxicos de Galicia. A cita será o vindeiro 8 de novembro no restaurante Chicolino. Aquelas persoas interesadas en asistir á cea só teñen que enviar un correo electrónico cos seus datos para facer a reserva a penhasboiroac@gmail.com.

O conselleiro de Emprego, José González, anunciou esta mañá en Rianxo que a Xunta, na súa aposta por potenciar a formación nos oficios tradicionais, vai a sacar unha liña de bolsas para aprendices coa que pretende promover a remuda xeracional no ámbito da artesanía. Facía estas declaracións durante a visita ás instalacións de Estaleiros Catoira, un dos poucos talleres de carpintería de ribeira que quedan aínda activos en Galicia, a onde acudiu, acompañado da xerente da Fundación Artesanía de Galicia, Elena Fabeiro.

Boiro renova o seu compromiso coas entidades que traballan no municipio en beneficio da sociedade. Esta mañá tiña lugar o acto de sinatura dos convenios con estas asociacións que suporán un investimento próximo ós 46 mil euros.

A Casa da Xuventude de Ribeira acollerá tódolos venres polo tarde o programa de lecer para a mocidade ‘Ocio con Alas’. Trátase dun proxecto impulsado pola asociación ÁGAPE que busca a inclusión social plena de mozos neurodiverxentes.

O BNG da Pobra denuncia novos recortes no centro de saúde do municipio. Á supresión da quenda de tarde do PAC dende hai máis dun ano súmanse dúas novas baixas se cubrir no cadro de persoal. Na actualidade, tan só hai 3 médicos dos 6 con que debería contar o centro.

A versión estendida do Culturgal chegará a Ribeira os días 25 e 26 de outubro. O auditorio municipal acollerá dúas xornadas cheas de actividade como antesala á gran feira da cultura que se celebrará en novembro en Pontevedra. Contará con destacados creadores como Kivo Cadaval, Fran Sieira ou Susana Sampedro, entre outros.

O BNG levará de novo ó Parlamento a problemática do saneamento da Ría de Noia, unha vez que os nacionalistas tiveron coñecemento da falla de depuración das augas residuais nos últimos anos, cuxos vertidos van a parar directamente ó mar. Os nacionalistas pídenlle á Xunta unha actuación urxente para reverter a situación, que está a poñer en xaque a produción pesqueira e marisqueira da Ría.

O concello de Ribeira vén de completar o catálogo de persoal da Policía Local ó cen por cento. Hoxe mesmo incorporábase o último dos axentes conformando un cadre de persoal con 27 membros en activo ós que se suman 12 auxiliares.

Os cidadáns de Ribeira terán ocasión de mellorar as súas taxas de reciclaxe grazas ó novo punto móbil que vén de adquirir o concello. O vehículo percorrerá as parroquias para facilitar a recollida de residuos especiais como pilas, baterías, xoguetes ou aceites usados entre outros.