Barbanza - Muros - Noia

Gran susto o que se levaron os veciños deste edificio, o número 18, situado na céntrica rúa Rafael Calleja da Pobra, a consecuencia dun incendio orixinado na tarde de onte nunha das estancias do primeiro andar. Por fortuna non houbo que lamentar danos persoais. Aínda así, a consecuencia da mesta fumareda, foron desaloxadas seis persoas que residían no inmoble e que resultaron afectadas pola inhalación de fume, aínda que se escasa consideración.

Noia celebrará o próximo luns o pleno de organización da nova corporación municipal. Ademais do reparto de competencias, procederase á aprobación das retribucións que suporán un aforro próximo ó 20 por cento.

A praia de Río Azor acollerá este sábado a cuarta edición do Campionato Infantil de Fotografía Submarina. Está dirixido a nenos de ata 16 anos que competirán por tomar a mellor instantánea das distintas especies de peixe.

A Pobra prepárase para vivir as súas festas maiores, as do Nazareno, declaradas de Interese Turístico de Galicia. Celebraranse do 19 ó 22 de setembro. Serán catro días de actividades do máis variado, aínda que o día grande, será o domingo, cando se celebra a tradicional procesión das mortallas, na que se agarda a participación de miles de persoas.

Esta mañá presentábase en Noia a oitava edición do Trofeo Portus Apostoli. O torneo, que terá lugar este vindeiro venres a partir das oito da tarde no pavillón municipal Agustín Mourís, enfrontará ó equipo local, o Noia Fútbol Sala e o Palma Futsal.

A Deputación da Coruña destinará máis de 200 mil euros para a renovación integral da ría Cristóbal Colón en Ribeira. O vicepresidente do organismo provincial comprometeuse a axilizar a tramitación do convenio co concello para que poida ser aprobado polo pleno da corporación provincial nos próximos meses.

Transcorridos preto de dous meses da apertura da veda do polbo, o balance é do máis positivo. Aínda que é cedo para avaliar a campaña, as capturas na lonxa de Ribeira superan xa os cen mil quilos.

O executivo ribeirense vén de proceder á finalización dos traballos de mellora da iluminación do parque periurbano de San Roque. A actuación, levada a cabo nos últimos meses atendendo a unha demanda da propia veciñanza, supuxo un investimento de máis de 140 mil euros.

Ribeira acollerá o domingo 7 de setembro a 21 edición da Andaina 50 K, enmarcada na Liga Galega de Sendeirismo. Na proba, organizada polo Concello en colaboración coa Asociación de Veciños de Carreira, prevese unha participación dunhas 300 persoas.

O director de Turismo de Galicia visitou esta mañá o centro de recepción de visitantes do Castro de Baroña en Porto do Son.  Alí puido coñecer as actuacións que ten previstas o concello para favorecer a accesibilidade na contorna do xacemento así como regular o fluxo de visitantes.