RIBEIRA > O alcalde de Ribeira presentou o proxecto para a construción dun pavillón polideportivo municipal na parroquia de Palmeira.
O executivo ribeirés prevé inicia-la construción do pavillón polideportivo de Palmeira este mesmo verán na zona coñecida como Agro de Bacelo para que poida estar rematado no prazo dun ano.
O alcalde, Xosé Luís Torres Colomer, presentou en rolda de prensa o proxecto cun orzamento previsto de 1’3 millóns de euros. A nova instalación deportiva, cunha superficie total de máis de 2.600 metros cadrados, disporá de tódolos servizos.
Con esta actuación continúa a liña levada a cabo polo actual executivo ribeirés de ir dotando a tódalas parroquias de pavillón polideportivo cuberto, que se ampliará coa inauguración do de Aguiño e do de Artes.
Deste xeito a oferta en canto a instalacións deportivas no municipio é ampla, destacando as melloras realizadas no complexo deportivo da Fieiteira que incluiron a dotación dun novo vaso na piscina municipal e un novo campo de fútbol de herba artificial.
Redacción Barbanza
