Esta mañá, membros da Asociación de Diagnosticadas de Cancro de Mama en Galicia celebraron en Vilagarcía o Día Internacional contra o cancro de Mama.
Para iso instalaron unha carpa informativa na Praza de Galicia para ofrecer todo tipo de asesoramento sobre a enfermidade. Ademais presentaron a súa nova delegación no Salnés, na que levan traballando tres meses.
Esta nova sede naceu, segundo confesa a súa Presidenta un pouco por casualidade. Pero, asegura, xa teñen moitos proxectos en mente; todos orientados a ofrecer a maior axuda posible ás mulleres que teñan ou tiveran cancro de mama. Entre as súas demandas atópase a necesidade da creación dunha unidade de Mama no Hospital do Salnés.
A esta presentación tamén acudiu a edil de Igualdade e Benestar Social do concello de Vilagarcía, Ana Lorenzo e a concelleira de Sanidade, Victoria Hierro.
Ciclo de Charlas
E nesta liña de concienciación social tamén se enmarca o ciclo de charlas que dentro dunhas semanas iniciarán os profesionais da área materno infantil do hospital do Salnés.
As conferencias versarán sobre os beneficios da lactación materna para a saúde dos bebés. Impartiranse nos concellos de Vilagarcía, Cambados, Vilanova, A Illa, Ribadumia e Catoira ata principios do vindeiro ano, e están dirixidas a asociacións de mulleres e aqueles colectivos interesados.
Cabe lembrar que o Hospital do Salnés está acreditado como Hospital Amigo dos Nenos pola Organización Mundial da Saúde e Unicef, un galardón que se entrega a aqueles centros que cumpren os pasos básicos para garantir unha lactación natural feliz.
Catorce hospitais de toda España contan con este recoñecemento, e o do Salnés é o único galego.
VILAGARCÍA> Ademais, ADICAM presentou a súa nova sede no Salnés para ofrecer asesoramento sobre a enfermidade ás mulleres da comarca. 
