SALNÉS> Na Terceira o Vilalonga reciben en San Pedro a un rival directo pola permanencia como o Narón, mentres que o Portonovo xoga mañá na Baiuca ante o Estradense. Na Preferente Sur destaca o Céltiga – Lalín do domingo ás 16:30.
Partido de gran importancia o que se xoga en San Pedro. Vilalonga e Narón mídense nun encontro que pode marcar as súas traxectorias. Arestora son rivais directos pola salvación, pero un triunfo dos locais deixaría ós ferrolterráns a sete puntos e de suceder o contrario a direrencia sería de tan só un.
Ademais, un terceiro triunfo consecutivo dos de Gabi Leis demostraría o seu gran momento de forma e reportaríalles aínda máis confianza para os vindeiros choques. O seu rival polo contra chega no peor momento dos últimos anos, con dous puntos sumados dos últimos trinta en xogo.
Por outra parte, o plantel recibíu onte a primeira mensualidade que a directiva lle adebedaba. O club traballa duro tanto para saír do pozo deportivo como do económico.
A nivel resultados as cousas van peor en Baltar, xa que o Portonovo ocupa a derradeira posición da xeral. Mídese nun encontro adiantado á xornada do sábado ó Estradense, un clásico da categoría pese a ser un recén ascendido. Fabiano conta cun plantel profundo e de calidade deseñado para non pasar apuros este ano e que se comporta mellor coma local. Todo o contrario que o Portonovo, que de momento so foi quen de vencer fóra da casa e que buscará o terceiro triunfo do campionato que lle permita seguir medrando.
Na Preferente Sur un dos encontros máis interesantes da xornada será o que xoguen no Salvador Otero dous candidatos ó ascenso: Céltiga e Lalín. Os do Deza chegan á cita como líderes con cinco victorias seguidas, mentres que na Illa quérese marcar un punto de inflexión a partir deste choque. Rial recupera para a cita a dous xogadores importantes como Nacho e Aarón.
Outro en xeira de resultados é o Sanxenxo. Catro triunfos consecutivos para os de Calucho que serán cinco se non pasa nada estrano o domingo, porque o que visita o Revel é o último da xeral. un equipo que aínda non puntuou, A Peroxa.
Precisamente o Arousa foi o último verdugo do pechacancelas. Os de Lino González tomaron aire con ese triunfo a domicilio que agora lles permitirá afrontar con maior tranquilidade un partido importante ante o Porriño, un rival directo pola permanencia que leva sete encontros sen gañar.
Mentres o Ribadumia busca recuperar sensacións tralo tropezo da semana pasada ante o Sanxenxo. O conxunto de Carducho está a demostrar que é un equipo a ter en conta este ano e por iso quererán traerse os puntos do campo do Choco, un conxunto que camiña xusto por diante deles na xeral.
Mentres o Cambados desprázase a Vigo para enfrontarse ó Gran Peña. Ángel Oliveira non poderá sentarse no banquiño nun partido de vital importancia para os amarelos, que buscan escapar da zona baixa da xeral.
Redacción Salnés
