Vilanova e Vilagarcía reciben o proxecto de ampliación do hospital

{flowplayer img=https://www.canalriasbaixas.com/images/ano2014/08agosto/08/AMPLIACIONSALNESPALNOS.jpg}https://www.canalriasbaixas.com/images/ano2014/08agosto/08/AMPLIACION_HOSPITAL_SALNES.mp4{/flowplayer} SALNÉS> Vilanova e Vilagarcía recibiron xa o proxecto de ampliación do Hospital do Salnés para que os seus gobernos procedan a outorgar a licenza das obras ó ser os dous municipios afectados pola actuación. O alcalde de Vilanova e presidente da Mancomunidade do Salnés xa avanzou que o tramitarán coa maior celeridade e que convocará ós alcaldes para avaliar un problema que se lles presenta: a perda de preto de duascentas prazas de aparcamento. Vilanova e Vilagarcía xa contan co proxecto de ampliación do Hospital do Salnés. A Xunta remitiulles o documento para que procedan á tramitación do outorgamento de licenza de obras ó ser os dous municipios afectados pola actuación. Unha vez realizada a xestión, a pelota volverá a mans do goberno galego para que proceda á contratación dos traballos. En Vilanova, o alcalde e presidente da Mancomunidade do Salnés, Gonzalo Durán, xa avanzou que axilizarán o permiso o máximo posible para que poida estar informado polo servizo técnico nunha semana. Gonzalo Durán calcula que a ocupación do terreo podería facerse sobre os meses de outubro – novembro. Pero agora xorde outro problema que lle preocupa. Executar a ampliación suporá perder preto de 200 prazas de aparcamento, xa que a obra se realizará sobre espazo dedicado actualmente a estacionamento. Pendente de axilizar a solución a este problema, prevé convocar ós alcaldes dos municipios que pertencen a área sanitaria do Salnés para valorar opcións. Entre as posibilidades, adquirir unha parcela de tres mil metros cadrados na marxe sur do hospital, pero estarían pendentes do financiamento e aínda así non sería suficiente para cubrir a perda de prazas da ampliación.