Fajardo tomou posesión como presidente da Federación Galega de Confrarías

GALICIA> Tomás Fajardo, patrón maior de Porto do Son, tomou posesión como novo presidente da Federación Galega de Confrarías. A conselleira do Medio Rural e do Mar, Rosa Quintana, ofreceu diálogo permanente e traballo conxunto na procura de solucións aos problemas e retos que afronta o sector marítimo-pesqueiro. Rosa Quintana sinalou que este diálogo ‘será decisivo para avanzar na procura da solución dos problemas do día a día do sector’. Entre as cuestións urxentes a resolver, a conselleira citou o mantemento do arte do xeito, na defensa do cal xa se pronunciou por unanimidade o Parlamento de Galicia e se enviaron alegacións a Bruxelas. Tamén sinalou a importancia da loita contra o furtivismo e da mellora da comercialización. A conselleira indicou tamén que haberá situacións difíciles como os episodios de toxinas vividos este ano ou a baixa na produción marisqueira nalgunhas zonas, ou mesmo a paulatina implantación da política dos descartes que recolle a nova PCP. Fronte a estes problemas destacou a necesidade de encontrar alternativas, como por exemplo mellorar a comercialización revalorizando uns produtos de primeira calidade como son os das nosas rías. Tamén, con accións de recuperación de zonas de marisqueo improdutivas.

DEIXAR UNHA RESPOSTA

Por favor, engade un comentario!
Por favor, engade o teu nome aquí