A Deputación promove a divulgación do patrimonio entre os máis pequenos

    A CORUÑA> A Deputación da Coruña porá en marcha un Plan de Turismo Escolar encamiñado a divulgar o patrimonio cultural entre os nenos de infantil e primaria. Inicialmente desenvolveranse tres rutas guiadas polos inmobles e elementos patrimoniais máis singulares da provincia. Ademais da conservación, protección e posta en valor do noso patrimonio cultural, a Deputación da Coruña pretende ir un paso máis aló divulgando entre os máis pequenos o valor destes elementos que conforman a nosa historia. Con este obxectivo, a administración provincial porán en marcha o Programa de Turismo Escolar do que se beneficiarán os nenos de infantil e primaria de toda a provincia. Coa axuda dos monitores especializados, os nenos terán ocasión de plasmar as impresións destas visitas a través dun relato ou dun debuxo. Traballos que optarán a dous premios en cada categoría do concurso convocado pola Deputación. O programa nace con vocación de continuidade nos vindeiros cursos nos que a Deputación está aberta ás suxestións dos propios centros para elaborar novos itinerarios. Coa posta en marcha desta iniciativa de divulgación, o ente provincial dá continuidade á campaña de promoción do noso patrimonio iniciada hai uns meses coa distribución dun vídeo turístico con presenza en FITUR.