GALICIA> O Tribunal Supremo recoñece a existencia de delito medioambiental no Caso Prestige. Esta resolución, a raíz dos recursos presentados contra a sentenza inicial, obriga á armadora e á empresa aseguradora ó pago de indemnizacións. A sentenza do caso Prestige, emitida en novembro de 2013, tan só condenaba ó capitán do barco, Apostolos Mangouras, a nove meses por desobediencia grave pero eximía a tódolos acusados de delito medioambiental. Agora, o Tribunal Supremo vén de resolver que si existiu tal delito a raíz dos doce recursos presentados á sentenza inicial. Condena ó capitán a dous anos de prisión por delito contra o medio ambiente en grao de imprudencia grave. Isto supón que os afectados poderán cobrar indemnizacións que correrán a cargo da empresa armadora e a aseguradora da mesma. A sentenza non establece o importe da responsabilidade civil polo que haberá que agardar ó proceso de execución da sentenza, que se prevé longo, para saber o alcance das compensacións ós preto de dezaoito mil afectados. O fallo do Supremo mantén a absolución ó xefe de máquinas, Nikilas Argyropoulos, e ó ex director xeral da Mariña Mercante, José Luíz López Sors, polo que o estado non deberá asumir a responsabilidade civil subsidiaria.
Inicio Barbanza - Muros - Noia
