A POBRA> O concello da Pobra volverá ofertar este verán viaxes en catamarán ás Illas Atlánticas. As saídas ás Illas Cíes, Ons e Sálvora estarán organizadas pola empresa Piratas de Nabia.
A concellería de Turismo da Pobra segue a apostar por dar a coñecer a ampla riqueza das Illas Atlánticas a través de varias saídas en catamarán entres os meses de xuño a setembro. As rutas sairán dende o porto da Pobra e, ademais do transporte marítimo, incluirán visitas a cargo de guías profesionais do Parque Marítimo Terrestre das Illas Atlánticas.
As saídas ás Cíes desenvolveranse o 28 de xuño e o 6 de setembro, a Ons o 26 de xullo e 23 de agosto e a Sálvora o 19 de xullo e o 8 de agosto, esta última en horario nocturno para observación astronómica.
A información sobre horarios e prezos pode consultarse na web de Piratas de Nabia onde xa se pode realizar a reserva de prazas.
